«Ըստ ԱՀԾ զեկույցի՝ ո՞ր սուբյեկտների կողմից է իրականացվում հիբիդային հարձակումներ Հայաստանի դեմ և արդյո՞ք այս պահի դրությամբ Թուրքիան և Ադրբեջանը դիտարկվում են որպես Հայաստանի Հանրապետության համար անվտանագային սպառնալիքներ հարուցող սուբյեկտներ»,– անվտանգային թեմայով համաժողովի ժամանակ հետաքրքրվեցին ՀՀ արտաքին հետախուզության ծառայության պետ Քրիստիննե Գրիգորյանից։Ի պատասխան՝ նա նշեց, որ ԱՀԾ զեկույցի հրապարակումը միայն հանրային հաշվետվողականության ապահովման նպատակ չէր հետապնդում․ «Մենք ունեինք նաև իրազեկման նպատակ, բայց հետախուզական ծառայությունները այդ նպատակը սպասարկելու հարցում ունեն որշակի սահմանափակումներ, և դա բնորոշ է աշխարհի գրեթե բոլոր հետախուզական ծառայություններին»,– ասաց Գրիգորյանը։
Նրա «անձնական» կարծիքով՝ այդ զեկույցը բավականին թափանցիկ էր գրված և այնտեղ շատ երկիմաստություններ չկան․ «Ավանդաբար և նորմալ պայմաններում հետախուզությունները չեն բացահայտում իրենց հիմնական թիրախները և չեն դետալացնում դրանք, այլ հանգիստ աշխատում են այդ ուղղությամբ, դա նաև մեր արդյունավետության ապահովման երաշխիքն է»,– ասաց ԱՀԾ պետը։
Գրիգորյանը նաև հայտարարեց՝ հիբրիդային սպառնալիքը չի կարող գալ մեկ աղբյուրից, դա անհնար է, և Հայաստանն էլ այստեղ բացառություն չէ․ «Մեր հիբրիդային վտանգների աղբյուրներն ունեն տարբեր աշխարհագրություն, և բնականաբար, կոնֆլիկտի ու սառը հարաբերությունների պատմությունն ունի իր որոշակի ազդեցությունը և դա հնարավոր չէ հերքել»,– նշեց նա։
