Ներկայում Հայաստանի և Ադրբեջանի հարաբերությունները մտնում են նոր փուլ՝ շրջան, որտեղ երկու երկրներն ու նրանց ղեկավարները հրապարակայնորեն ընդգծել են խաղաղության նկատմամբ իրենց հանձնառությունը։
Այս մասին Իրան կատարած այցի շրջանակում իրանական IRNA գործակալությանը տված հարցազրույցում ասել է ՀՀ ԱԳ փոխնախարար Վահան Կոստանյանը և խոսել Իրանի հետ հարաբերությունների վրա այդ ամենի ազդեցության մասին:
«Սա դրական ազդեցություն կունենա ոչ միայն մեր երկկողմ հարաբերությունների, այլև տարածաշրջանային դինամիկայի վրա՝ քաղաքականությունից մինչև տնտեսություն։
Մեր հիմնական պայմանավորվածություններից մեկը Ադրբեջանի հետ տարածաշրջանում հաղորդակցման ուղիների վերաբացումն է՝ երկրների ինքնիշխանության, իրավասության և տարածքային ամբողջականության փոխադարձ հարգանքի պայմաններում։
Գործնականում սա նոր հնարավորություններ կբացի Հայաստանի և Իրանի երկաթուղային համագործակցության համար, ներառյալ Նախիջևան-Ջուլֆա երկաթուղային գիծը, ինչը կնշանակի Իրանի մուտքը Հայաստան և, ի վերջո, դեպի Սև ծով», - ասել է Կոստանյանը։։
Նա հավելել է, որ որպես ՀՀ կառավարության ներկայացուցիչ Իրան է ժամանել ուղերձով, ըստ որի՝ Հայաստանը հաշվի է առնում Իրանի մտահոգությունները, և այդ զգայուն հարցերը ներառվել են TRIPP («Թրամփի ուղի») փոխկապակցության նախագծի շուրջ նախնական բանակցությունների ընթացքում։
«Այս նախագծի որոշ մանրամասներ արդեն հստակեցվել և համաձայնեցվել են, ես դա փոխանցել եմ իրանական կողմին և պատրաստ եմ հրապարակայնորեն ներկայացնել։ Հայաստանում նախատեսվում է գրանցել մի ընկերություն, որի բաժնետոմսերը կբաժանվեն Հայաստանի և Միացյալ Նահանգների միջև, սակայն սա չի նշանակում ԱՄՆ ներկայություն տարածաշրջանի անվտանգության ոլորտում։ Մենք գիտենք, որ սա Իրանի հիմնական մտահոգություններից էր, և ես վստահ եմ, որ այդ մտահոգությունը լուծված է։
Մեզ համար Իրանի և Հայաստանի սահմանի ու նրա անցակետերի անխափան և անարգել աշխատանքը՝ ապրանքների և ուղևորների տեղափոխման համար, ռազմավարական նշանակություն ունի, և մենք չենք կարծում, որ այս առումով որևէ խոչընդոտ կստեղծվի։
Կապուղիների բացումը, ներառյալ երեք նոր նախագծերը, կիրականացվի երկրների ինքնիշխանության և իրավասության հիման վրա, ինչը ևս մեկ երաշխիք է», - մանրամասնել է Կոստանյանը։
