Apple-ը iPhone 17 շարքը և իր մյուս նոր արտադրանքները կներկայացնի սեպտեմբերի 9-ին։ Այս մասին հայտնել է գերմանական iPhone-Ticker պորտալը՝ հղում անելով գերմանական հեռահաղորդակցության ոլորտի աղբյուրներին։
Հատկանշական է, որ այս տվյալները համընկնում են Bloomberg-ի լրագրող Մարկ Գուրմանի կանխատեսման հետ, որը նախկինում սեպտեմբերի 9-ը կամ 10-ը նշել էր որպես Apple-ի շնորհանդեսի ամենահավանական ամսաթվեր։
Apple-ի ավանդական սխեմայի համաձայն՝ նախնական պատվերների մեկնարկը նախատեսված է ուրբաթ՝ սեպտեմբերի 12-ին, իսկ խանութներին և հաճախորդներին առաջին առաքումները սպասվում են սեպտեմբերի 19-ին։ Այդ օրը սմարթֆոնները հասանելի կլինեն հիմնական տարածաշրջաններում, այդ թվում՝ ԱՄՆ-ում, Չինաստանում, Եվրոպայում և Ճապոնիայում։
Սեպտեմբերի 9-ի շնորհանդեսի շրջանակներում նախատեսվում է միանգամից չորս մոդելի հայտարարում՝ iPhone 17, iPhone 17 Air, որը կփոխարինի Plus տարբերակին, iPhone 17 Pro և iPhone 17 Pro Max։ Ընկերությունը, հավանաբար, կներկայացնի նաև Apple Watch Series 11, Apple Watch SE 3, Apple Watch Ultra 3 և, հնարավոր է, AirPods Pro 3 ականջակալներ։
Apple-ը, ամենայն հավանականությամբ, պաշտոնապես կհայտարարի շնորհանդեսի ամսաթիվը և հրավերներ կուղարկի բլոգերներին և լրատվամիջոցներին միջոցառումից մեկ շաբաթ առաջ, այսինքն՝ սեպտեմբերի 2-ին։
Թարգմանությունը՝ Euromedia24.com-ի
