Եվրամիությունը Միացյալ Նահանգների հետ կնքել է անշահավետ, անիրագործելի և անօրինական գործարք, որը, ներմուծման մաքսատուրքերից բացի, վերաբերում է եվրոպացիների կողմից Ուկրաինայի համար ամերիկյան զենքի գնմանը։
Այս մասին հայտարարել է Հունգարիայի վարչապետ Վիկտոր Օրբանը՝ «Կոշութ» ռադիոյի առավոտյան ծրագրում մեկնաբանելով Եվրահանձնաժողովի նախագահ Ուրսուլա ֆոն դեր Լեյենի և ԱՄՆ նախագահ Դոնալդ Թրամփի միջև կնքված պայմանավորվածությունները։
«Եվրահանձնաժողովի նախագահը Ամերիկայի առջև պարտավորություններ է ստանձնել, որոնք նրա իրավասության մեջ չեն մտնում», - ասել է կառավարության ղեկավարը՝ ֆոն դեր Լեյենի կողմից Թրամփին տված խոստումների վերաբերյալ։
Օրբանը նշել է, որ խոսքը միայն ներմուծման մաքսատուրքերի մասին չէ, այլ նաև «[համաձայնագրի] գաղտնի կետի մասին, որը վերաբերում է Ուկրաինային զենքի մատակարարումներին», ամերիկյան էներգետիկ ռեսուրսների 750 միլիարդ դոլարի գնումներին և ԱՄՆ տնտեսությունում 600 միլիարդ դոլարի եվրոպական ներդրումներին։
