Ինչպես արդեն հայտնել ենք, ադրբեջանցիները օկուպացված Ստեփանակերտում ոչնչացրել են ծովանկարիչ Հովհաննես (Իվան) Այվազովսկու հուշարձանը։Բաքվի կողմից վանդալիզմի հերթական դեպքին անդրադարձել են նաև ռուսական լրատվամիջոցները։
«Readovka» տելեգրամյան ալիքը գրում է, որ ապամոնտաժման պատճառների վերաբերյալ պաշտոնական մեկնաբանություններ Ադրբեջանի կողմից դեռ չկան, սակայն այս քայլը, հատկապես հաշվի առնելով ամսաթիվը, ցուցադրական է թվում։
Ալիքը հիշեցնում է, որ հուշարձանը տեղադրվել է 2021 թվականի դեկտեմբերին՝ «Ռուսական փառքի ծառուղի» նախագծի շրջանակներում։ Դրա բացումը Լեռնային Ղարաբաղի Հանրապետության ռուսական համայնքի, ռուսական խաղաղապահ զորքերի և այն ժամանակ գործող հանրապետության իշխանությունների համատեղ նախաձեռնությունն էր։
«Շատ հավանական է նաև, որ սա ոչ միայն ուրիշի մշակութային կոդի խորհրդանշական հեռացում է, այլև արձագանք Ռուսաստանում վերջին իրադարձություններին, մասնավորապես՝ Եկատերինբուրգում սպանությունների հետաքննության շրջանակներում ադրբեջանական սփյուռքի ներկայացուցիչների ձերբակալմանը»,– գրում է ալիքը։
«Gazeta.ru»-ն, «Lenta.ru»-ն, «MK-ru»–ն իրենց հերթին մեջբերում են «Սպուտնիկ Արմենիա»–ին՝ Ադրբեջանի գործողությունները որակելով որպես «հայկական մշակութային ժառանգության ոչնչացման ևս մեկ դեպք»։
