Բագրատ Սրբազանը ԱԺ ամբիոնից դիմեց ՔՊ-ին ու կոչ արեց «դադար տալ, ներողություն խնդրել»

ԱԺ-ի ընթացքը սկսենք չարի մերժման աղոթքով՝ իմաստություն խնդրելով տիրոջից, մեր ամբողջ գործընթացի և ողջ ընթացքի համար։ Այս մասին այսօր՝ հոկտեմբերի 17-ին, ԱԺ ամբիոնից հայտարարեց Բագրատ Սրբազանը՝ իր ելույթը սկսելով աղոթքով։

«Այս կառավարության ղեկավարն ամբողջությամբ գիտակցում է, թե ինչպիսի արագությամբ ու խորությամբ է ձախողել մեր պետականության հիմքերն ու ինքնիշխանությունը։ Քաջ գիտակցելով իր հանցանքի չափաբաժինը՝ փորձում է իր շուրջը գտնվող բոլորին դարձնել հանցակից։

Կարող էի ասել, որ ինձ չի հուզում «Քաղաքացիական պայմանագիր» կուսակցության ո՛չ շարքային անդամների, ո՛չ պատգամավորների ու կառավարության անդամների, մանր ու միջին կուսակցականների, իշխանամերձ ու իշխանամեջ տարբեր գործիչների ու գործիքների ճակատագիրը, ասելով, որ դրանով թող մտահոգվեն Հայաստանում հավատարմագրված դեսպանատները, սակայն ինձ հուզում է «Քաղաքացիական պայմանագիր» ընտրած 680 հազար հայ մարդկանց ճակատին ՔՊ-ի կողմից դաջվող երկիրը հանձնողների պիտակավորումն ու մեղքը։ Ինձ հուզում է մեր երկրում տեղ գտած արհավիրքի իրական չափերն ու պատկերը»,- ասաց Սրբազանը։

Նա նշե, որ իրենց պայքարը շարունակվում է՝ հակառակ բոլոր տեսակի մարդկային տկարությունների, շահերի ու խարդավանքների, որովհետև այս պայքարը ներկա անպատիվ ընթացքը կասեցնելու ու մեր պետականությունը վերականգնելու մասին է։

«Շարժմանը հաջողվեց կանգնեցնել այն ընթացքը, որը պարունակում էր անկլավների հանձնումն ու նոր տարածքների զիջումը»,- ԱԺ իր ելույթում նշեց Բագրատ Սրբազանը։