Ճապոնիան պատրաստ է քննարկել Միացյալ Նահանգներից ավելի շատ զենք գնելու հնարավորությունը, որպեսզի կրճատի Միացյալ Նահանգների հետ սեփական առևտրային ավելցուկը, ինչը զայրացրել է ԱՄՆ նախագահ Դոնալդ Թրամփին։ Այս մասին լրագրողներին հայտարարել է Ճապոնիայի տնտեսական վերականգնման նախարար Ռյոսեյ Ակազավան, որը բանակցություններում ներկայացնում է Տոկիոն։
«Եթե հարցնում եք՝ կարող ենք արդյոք քննարկել նման հնարավորություն, ես կասեի՝ այո», – նրա խոսքերն է մեջբերում «Կիոդո» լրատվական գործակալությունը։
Միաժամանակ, Ակազավան ընդգծել է, որ Տոկիոյի և Վաշինգտոնի միջև սակագների և առևտրային քաղաքականության վերաբերյալ երկխոսությունը անջատ է անվտանգության հարցերի շուրջ երկխոսությունից և հիմնված է «բոլորովին այլ տրամաբանության» վրա, ուստի, «սխալ է խառնել այս երկու հարցերը»։
Ճապոնիան և Միացյալ Նահանգները արդեն անցկացրել են սակագների և առևտրային քաղաքականության վերաբերյալ բանակցությունների երեք փուլ։ Մայիսի սկզբին Ակազավան հայտարարել էր, որ կողմերը դեռ շատ հեռու են համաձայնության հասնելուց։ Սակայն, երրորդ փուլից հետո նա հայտարարել է, որ Տոկիոն հույս ունի համաձայնության գալ Վաշինգտոնի հետ մինչև «Յոթի խմբի» (G7) գագաթնաժողովը, որը տեղի կունենա կանադական Կանանասկիս հանգստավայրում (Ալբերտա) հունիսի 15-17-ը։
