Երեկ Առողջապահության նախարարությունում թեժ քննարկումներ են տեղի ունեցել։ Առողջապահության նախարարի մոտ են եղել ԲԿ-ների տնօրեններ ու որոշների համար հանդիպումը շատ տխուր ավարտ է ունեցել։
Euromedia24-ի տեղեկություններով երեկ նախարար Ավանեսյանը հասկացրել է իր ենթակայությամբ գործող ամենախոշոր բժշկական կենտրոնի տնօրենին՝ Սուրբ Գր․ Լուսավորչի ղեկավար Արման Հովակիմյանին, որ դիմում գրի հեռանա պաշտոնից, նույն հրահանգը ստացել է նաև Վ․Ֆանարջյանի անվան ուռուցքաբանության ազգային կենտրոնի տնօրեն Նարեկ Մանուկյանը:
Մեզ հայտնի է դարձել, որ հանդիպման շարժառիթն ու հիմնական քննարկումները վերաբերել են ՊՎԾ-ի ուսումնասիրություններին, ավելի ստույգ՝ 2024 թվականին Հայաստանի հիվանդանոցներում պետպատվերով բուժվողների կողմից չհիմնավորված նվիրատվությունների սկանդալային արտահոսքին և դրան հետևած իրավական գործընթացին։
Այս կոռուպցիոն սկանդալը, հիշեցնենք, սոցցանցում և մամուլում առաջինը պայթեցրեց առողջապահական ոլորտի իրավապաշտպան Անուշ Պողոսյանը՝ հայտնելով, որ միլիարդների է հասնում հիվանդանոցի տնօրինությունների կողմից ապօրինի չհիմնավորված դրամահավաքի դեպքերը, որոնք մատուցվում են պետպատվերով բուժում ստացած բուժառուներից ստացած նվիրատվությունների անվան տակ։
Պողոսյանի հրապարակումից օրեր անց անսպասելիորեն Պետական վերահսկողական ծառայությունը սկսեց ստուգումներ առողջապահական համակարգում։
ՊՎԾ ղեկավար Ռոմանոս Պետրոսյանն օրեր առաջ ԱԺ-ում անդարադարձել է այս կասկածելի նվիրատվություններով համակարգում սկիզբ առած կոռուպցիոն սխեմային՝ նշելով ՊՎԾ-ն ուսումնասիրություն է իրականացնում և դրանք ավարտելուն պես կհրապարակվեն արդյունքները։
Մեր տեղեկություններով Սուրբ Գրիգոր Լուսավորիչ կենտրոնի տնօրեն կնշանակվի ԱԺ առողջապահության հարցերի մշտական հանձնաժողովի նախկին նախագահ Նարեկ Զեյնալյանը։
