Դառը մթերքները կարող են պայքարել հիպերտոնիայի, սրտանոթային հիվանդությունների և շաքարախտի դեմ և դանդաղեցնել բջիջների ծերացման գործընթացը։ Սա ցույց է տվել Չինաստանի Luohe University of Professional Food Engineering-ի գիտնականների հետազոտությունը։ Արդյունքները հրապարակվել են Foods ամսագրում։
Գիտնականները նման եզրակացության են եկել նախորդ գիտական աշխատությունների մետավերլուծության արդյունքում, որոնց հետազոտության թեման դառը նյութերի՝ ալկալոիդների, պոլիֆենոլների, տերպենոիդների և ամինաթթուների հատկություններն էին։
Դառը նյութեր կան բնական մթերքներում, ինչպիսիք են հնդկաձավարը, դառը դդումը, դանդելիոնը, հատիկները, ընկույզը և սուրճը: Այս նյութերը ոչ միայն սննդին տալիս են կոնկրետ համ, այլեւ մի շարք դրական ազդեցություններ են ունենում։ Օրինակ՝ դրանք օգնում են կանխել հիպերտոնիան, նվազեցնել շաքարի և ճարպերի (տրիգլիցերիդների) մակարդակը արյան մեջ, ինչպես նաև ունեն հակաբորբոքային, հակաօքսիդանտ և հակաբակտերիալ ազդեցություն։
Հատկապես կարևոր է, ըստ գիտնականների, դառնության հակաօքսիդանտ ազդեցությունը, որն օգնում է բջիջները պաշտպանել անկայուն մոլեկուլների պատճառած վնասներից: Հակաօքսիդանտները նաև դանդաղեցնում են ծերացումը և օգնում կանխել սրտանոթային հիվանդությունները և շաքարախտը:
Ինչպես նշում են գիտնականները, դառը մթերքները նույնպես դրական են ազդում մարսողության վրա՝ լավացնելով ստամոքսի թթվի և լեղու արտադրությունը, ինչպես նաև նպաստում են ճարպերի ավելի լավ մարսմանը։ Դառը մթերքները հատկապես օգտակար են շաքարային դիաբետով և գիրություն ունեցող մարդկանց համար. դառը մթերքները նվազեցնում են ախորժակը և օգնում են հաղթահարել քաղցրավենիքի հանդեպ հակումը:
Թարգմանությունը՝ Մանուել Թամազյանի
