Անկախ միջազգային և տարածաշրջանային գործընթացներից՝ Հայաստանի գլխավոր խնդիրը մեկն է՝ օր առաջ ձերբազատվել «Փաշինյան Նիկոլ» երևույթից և ձևավորել ազգային ղեկավարություն: Այս մասին Euromedia24-ին տված հարցազրույցում հայտարարեց «Ազգային-ժողովրդավարական բևեռ» շարժման խորհրդի անդամ Ժիրայր Սէֆիլյանը:
Խոսելով աշխարհաքաղաքական զարգացումների մասին՝ Ժիրայր Սէֆիլյանը նշեց, որ համամիտ չէ այն տեսակետի հետ, որ աշխարհը գնում է դեպի բազմաբևեռ աշխարհակարգի ձևավորում: Ըստ նրա՝ ընդհակառակը, միաբևեռ աշխարհակարգն է ամրապնդվում: Ինչ վերաբերում է տարածաշրջանին՝ Ժիրայր Սէֆիլյանը համոզված է, որ «այս ամենի ավարտը պիտի լինի Ռուսաստանի իսպառ նահանջը Հարավային Կովկասից»: ԱԺԲ-ի ղեկավար մարմնի ներկայացուցիչը դեմ է «թշնամի Ռուսաստանի» հետ դաշնակցելուն, իսկ Իրանին համարում է Հայաստանի բնական դաշնակիցը:
Ժիրայր Սէֆիլյանը նաև ուշագրավ մանրամասներ պատմեց, թե իր մեկնաբանությամբ՝ ինչպես է 2018-ին Հայաստանում տեղի ունեցել Նիկոլ Փաշինյանի «թավշյա հեղափոխությունը»: Զրուցակիցը համոզված է, որ ինչպես 2018-ին, այնպես էլ 2020 թ. 44-օրյա պատերազմի ժամանակ Փաշինյանը ամբողջությամբ կառավարվել է Մոսկվայից: Ըստ նրա՝ 2018 թ. ապրիլին Մոսկվան որպես «Պլան Բ» աշխատեցրել է Փաշինյանի ընդվզումը, քանի որ Սերժ Սարգսյանը, ժողովրդական լեզվով ասած, «քցել էր» Մոսկվային՝ խախտելով պայմանավորվածությունը, որ իշխանությունը թողնելու է վարչապետի պաշտոնը զբաղեցնող Կարեն Կարապետյանին:
Սէֆիլյանի խոսքով՝ «2018 թվականին Մոսկվան որոշել է փոփոխություններ Կարեն Կարապետյանի տեսքով, Արևմուտքը ուղեկցել է այս գործընթացին, այն ժամանակ չենք նկատել, բայց վերջին տարիներին արդեն պարզ է, որ Թուրքիան ևս ուղեկցել է այս գործընթացին, այսինքն՝ «Փաշինյան Նիկոլ թիմ» հասկացությունը ոչ միայն ռուսական, այլև թուրքական ազդեցություն էր»:
Մանրամասները՝ տեսանյութում:
Հարցազրույցը վարեց Արամ Սարգսյանը
