Արցախի ռազմաքաղաքական ղեկավարության դատավարության ընթացքում տեսնում ենք, որ գործ ունենք այնպիսի իրողությունների հետ, որ մարդկանց խոշտանգում են։ Այդ խոշտանգումների դեմ ի՞նչ ճանապարհ կա, որպեսզի դրա դեմն առնվի․ իհարկե, միջազգային հանրության որոշակի արձագանք։ Այս մասին լրագրողների հետ զրույցում ասաց ԱԺ պաշտպանության և անվտանգության հարցերի հանձնաժողովի նախագահ, ՔՊ–ական պատգամավոր Անդրանիկ Քոչարյանը։
«Ռուբեն Վարդանյանի դեմքին գրված է, թե ինչ է տեղի ունենում նրանց հետ Բաքվի բերդում»,– ասաց նա՝ հիշեցնելով, որ Արցախյան առաջին ազատամարտի ժամանակ Մանվել Գրիգորյանը, Սամվել Բաբայանը և այլք «Օմոնի» գործողությունների արդյունքում հայտնվել են գերության մեջ, բայց հետո եղել է նրանց վերադարձնելու հնարավորություն փոխանակումների միջոցով։
Նրա խոսքով՝ Ադրբեջանի հետ երկխոսության մակարդակը պիտի բարձրացնել և ամուր պահել երկրի անվտանագային համակարգը՝ նաև լրագրողների շնորհիվ, որպեսզի հայկական կողմը վստահ զգա իրեն այդ երկխոսության մեջ։
«Ռուբեն Վարդանյանը մեծահարոսւտ անձնավորություն է, ստեղծել է «Ավրորա» մրցանակաբաշխությունը, որը շատ կարևոր հումանիտար միջազգային գործընթաց ապրած համակարգ էր։ Այսօր «Ավրորան» անելիք չունի՞»,– ասաց նա։
Դիտարկմանը, որ Նիկոլ Փաշինյանը ժամանակին հայտարարություն էր արել Ռուբեն Վարդանյանի՝ Արցախ գործուղման նպատակների մասին, Քոչարյանն արձագանքեց․ «Ռուբեն Վարդանյանը ժամանակին այնքան բաներ է ասել, որ այսօր օգտագործվում է իր դեմ»։
