Ադրբեջանը շարունակում է հետևողականորեն սրել Ռուսաստանի հետ հարաբերությունները: Նախորդ շաբաթ այս երկիրը Ալիևի հրամանով հումանիտար օգնության հերթական խմբաքանակն ուղարկեց Ռուսաստանի հետ պատերազմի մեջ գտնվող Ուկրաինա, այնուհետև Ադրբեջանի արտաքին գործերի նախարարությունը պահանջեց Մոսկվայից փակել Բաքվում «Ռոսսոտրուդնիչեստվո»-ի տեղեկատվական-մշակութային կենտրոնը՝ «Ռուսական տունը», որին ադրբեջանական մամուլը համեմատում էր ամերիկյան USAID-ի հետ՝ որպես «ակնհայտորեն հետախուզական կառուցվածք ունեցող կառույցի»: Ի դեպ, «Ռուսական տունն» արդեն հայտարարել է Բաքվում իր գործունեությունը դադարեցնելու մասին: Իսկ այս շաբաթ ադրբեջանական լրատվամիջոցները տեղեկություն տարածեցին այն մասին, որ Ադրբեջանը բացահայտել է Ռուսաստանի շահերը ներկայացնող լրտեսների խումբ, որի մեջ մտնում են նախկին բարձրաստիճան պաշտոնյաներ: Ռուսական որոշ կայքեր Ադրբեջանի գործողություններն գնահատում են որպես «Ալիևի կողմից դաշույնով հարված Ռուսաստանի թիկունքից»:
Թե ինչու է Ադրբեջանի ղեկավարությունը վատթարացնում իր հարաբերությունները Ռուսաստանի հետ՝ հավանաբար մամուլում դեռ երկար կքննարկվի: Ամեն դեպքում, Երևանի տեսանկյունից այս հարցն ունի որոշակի հետաքրքրություն՝ նկատի ունենալով ռուս-ադրբեջանական սերտացման բացասական ազդեցությունը հայկական շահերի վրա:
Մանրամասները՝ տեսանյութում:
Հեղինակ՝ Արամ Սարգսյան
