Փոխնախագահ Ջեյ Դի Վենսը, Իլոն Մասկը և Թրամփի վարչակազմի մյուս անդամները բացահայտորեն մարտահրավեր են նետում երկրի դատական համակարգի դարավոր իշխանությանը՝ կանխատեսելով ամերիկյան կառավարության հնարավոր սահմանադրական փլուզումը: Այս մասին գրում է CNN-ի վերլուծաբան Ջոան Բեսկուպիչը։
Խոսքը միայն այն մասին չէ, որ նոր վարչակազմը խախտել է մի շարք դաշնային օրենքներ և դատավարությունների հեղեղ է առաջացրել: Այլ պայմանավորված է նրանով, որ Դոնալդ Թրամփի որոշ գլխավոր խորհրդականներ կասկածի տակ են դրել՝ արդյոք այս հայցերի վերաբերյալ որոշումներն ընդհանրապես կսահմանափակեն նախագահին:
Նշումներ կան, որ դատավորների որոշ հրամաններ անտեսվել են։ Ռոդ Այլենդի դաշնային դատավորը պարզել է, որ վարչակազմը խախտել է միլիարդավոր դոլարների դաշնային օգնությունը ապասառեցնելու իր նախորդ հրամանի «պարզ լեզուն»: Դատավորը կարգադրել է վերականգնել բնապահպանական, առողջապահական և այլ ծրագրերի ֆինանսավորումը, որոնք կրճատվել էին։
Երկուշաբթի Վաշինգտոնում տեղի ունեցած առանձին գործով դաշնային աշխատակիցները դատավորին ասել էին, որ վարչակազմը չի կարողացել վերականգնել ԱՄՆ USAID-ի այն աշխատակիցներին, ովքեր պարտադրված արձակուրդի էին անցել: Արդարադատության դեպարտամենտն ասում է, որ նախագահը պետք է իրավասություն ունենա՝ որոշելու՝ ինչպես վարել կառավարությունը այս դեպքերում, և երբ դատավորները չափն անցնում են:
Գլխավոր դատավոր Ջոն Ռոբերթսը կարող էր կանխատեսել իրադարձությունների այս շրջադարձը վեց շաբաթ առաջ, երբ դեկտեմբերի վերջին նախազգուշացրել էր, որ «քաղաքական ողջ սպեկտրի ընտրված պաշտոնյաները ստեղծել են դաշնային դատարանների որոշումների բացահայտ արհամարհանքի սպառնալիք: Այս վտանգավոր առաջարկները, որքան էլ պատահական լինեն, պետք է կտրականապես մերժվեն»։
