Ռազմական փորձագետ Հայկ Նահապետյանի խոսքով՝ պաշտպանության նախարար Սուրեն Պապիկյանը Հնդկաստան է մեկնել ռազմատեխնիկական համագործակցության նպատակով։ Թեև պաշտոնապես ոչինչ չի հայտարարվում, սակայն ենթադրություններն այդպիսին են․ «Ես կարող եմ ենթադրել, որ դա ավելի շուտ ռազմատեխնիկական համագործակցության նպատակով է, որովհետև Հնդկաստանի որոշ տնտեսվարող սուբյեկտների հետ, որոնք զենք-զինամթերք են արտադրում, որոշ պայմանագրեր կան։ Ես կարծում եմ՝ ավելի շատ ռազմատեխնիկական համագործակցության նպատակով է այնտեղ։ Ճիշտ է, այդ մասին ոչինչ չի ասվում, բայց ենթադրությունները, ամենայն հավանականությամբ, այդպես են։ Հնդկաստանի հետ ունենք կնքած պայմանագրեր, բայց ցավոք սրտի, բայց զինամթերքը դեռ չգնված, արտահոսք է լինում։ Հիշում եք, երբ Հնդկաստանի հետ պայմանագիրը կնքվել էր, և նման տեղեկությունները սովորաբար գաղտնիք են, թե երկիրը ինչ զենք է գնում, որ երկրից է գնում, ինչ չափի է գնում և այլն, որովհետև սովորաբար կարելի է հաշվել զինված ուժերի առջև դրված մարտական խնդիրը երկրի ռազմաքաղաքական ղեկավարության կողմից։ Հնդկաստանից մի քանի անգամ նման արտահոսքեր եղան, որոնք ցանկալի չեն»,- Euromedia24-ի հետ զրույցում ասաց Նահապետյանը։
Փետրվարի 3-ին ՊՆ ռազմական բժիշկները մասնակցել են Գերմանիայում տեղակայված ԱՄՆ ռազմաբազայում անցկացվող զորավարժությանը, մինչդեռ Հայաստանը 44-օրյա պատերազմից հետո մի քանի անգամ մերժել է ՀԱՊԿ-ի կազմում զորավարժությունները։ Նահապետյանին հարցրինք, թե Հայաստանի նման մոտեցումը, երբ ԱՄՆ-ի հետ զորավարժություններ անցկացվում են, իսկ ՀԱՊԿ-ի հետ՝ ոչ, ինչ հետևանքներ կարող են ունենալ։ Նահապետյանը պատասխանեց․ «ՀԱՊԿ-ն 3 զորավարժություն պետք է անցկացվեր այստեղ, որոնք 3 տարվա ընթացքաում չի անցկացվել, Հայաստանը չի մասնակցել ՀԱՊԿ անդամ երկրների զորավարժություններին, հիմա ինչո՞ւ են այնտեղ, եւ ինչո՞ւ բժիշկները։ Հայաստանը միջազգային խաղաղապահ առաքելության մեջ ստորաբաժանում ունի, այդ թվում Կոսովոյում, Աղվանստանում Հայաստանը ներկայացված էր սակրավորներով, բժիշկներով և այլն, հիմա սա այդ տրամաբանության մեջ է։ Հասկանալի է, որ դրանք ՆԱՏՕ անդամ, երկրների զորավարժություններ են, այսինքն՝ Հայաստանը անվտանգային ճարտարապետությունը օրվա իշխանությունների ձեռամբ փոխում է և մասնակցում է դրսի զորավարժություններին, այս պահին բժիշկների մակարդակով, վաղը չէ մյուս օրը կարող է այլ զորատեսակների ներկայացուցիչներ մասնակցեն»,- ասաց Նահապետյանը։
Ըստ փորձագետի, սա մտնում է օրվա իշխանությունների՝ երկրի անվտանգության ռազմավարության մեջ, և իրենք փորձում են այս կամ այն ձևով ներգրավվել ՆԱՏՕ-ի անդամ երկրների հետ ռազմավարական համագործակցությանը։
Հայկ Նահապետյանի կարծիքով՝ դրա վերջը այնքան էլ լավ կարող է չլինել, որովհետև մեր տարածաշրջանում ՆԱՏՕ-ի ներկայացուցիչը Թուրքիան է․ «Քանի որ Փաշինյանի քաղաքականությունը ավելի շատ միտված է Թուրքիայի հետ սերտ համագործակցությանը, հարաբերությունների ստեղծմանը, և կարելի է ասել, որ օրվա իշխանությունը այլևս որդեգրել է մի գիծ, որով Թուրքիան տարածաշրջանում պետք է լինի դոմինանտ, և բնականաբար դա ի հաշիվ մեր երկու հարևանների՝ Ռուսաստանի դաշնության, որի հետ մենք ռազմավարական դաշնակից երկիր ենք, և Իրանի Իսլամական Հանրապետության, որի հետ մենք ռազմավարական գործընկեր երկիր ենք»,- ասաց Նահապետյանը։
Փորձագետի խոսքով՝ Փաշինյանի իշխանության նպատակն այն է, որ Թուրքիան տարածաշրջանում գերիշխող դիրք գրավի, այսինքն՝ Հայաստանում առկա է կոլաբորանտ իշխանություն։
