Լրատվամիջոցները շարունակում են քննարկել Ուկրաինայի վերաբերյալ ԱՄՆ նախագահ Դոնալդ Թրամփի խաղաղ նախաձեռնությունները, որոնք դեռ ոչ մի տեղ պաշտոնապես չեն հայտարարվել։Խաղաղության այս ծրագրի վերջին տարբերակը ներկայացրել է բրիտանական Daily Mail հրատարակությունը՝ հղում անելով սեփական աղբյուրներին։
Նրանք պնդում են, որ Թրամփի ծրագրի կետերն արդեն քննարկվել են Կիևի քաղաքական և դիվանագիտական շրջանակներում։ Պնդվում է, որ խաղաղ գործընթացի մեկնարկի հիմնական խթանը պետք է լինի Ուկրաինայի նախագահ Վոլոդիմիր Զելենսկու և ՌԴ նախագահ Վլադիմիր Պուտինի հեռախոսազրույցը։ Հրատարակության տվյալներով՝ այս խոսակցությունը պետք է լինի փետրվարի վերջին, իսկ մարտի սկզբին Զելենսկին ու Պուտինը պետք է անձնական հանդիպում անցկացնեն։
Հոդվածում ասվում է, որ սրանից հետո նախատեսվում է կազմակերպել միջազգային համաժողով՝ ԱՄՆ նախագահությամբ համաձայնագիր կնքելու։Նշվում է, որ զինադադարը կարող է սկսվել ապրիլի 20-ին, իսկ մինչև մայիսի 9-ը կողմերը պետք է համաձայնեցնեն զինված հակամարտությունը դադարեցնելու պարամետրերը։ Խաղաղության ծրագրի կետերը ներառում են Կիևի կողմից Ռուսաստանի նոր սահմանների ճանաչումը, զորքերի դուրսբերումը Կուրսկի շրջանից, ՆԱՏՕ-ին անդամակցելուց հրաժարվելը և միջուկային չեզոքությունը։
Միացյալ Նահանգները պարտավորվում է ռազմական աջակցություն ցուցաբերել Ուկրաինային մինչև 2030 թվականը և հեշտացնել նրա մուտքը Եվրամիություն։ Ինչպես նշում են աղբյուրները, ԵՄ-ն մասամբ կստանձնի Ուկրաինայի վերականգնման պատասխանատվությունը։
