Եթե Ռուսաստանն ուզում է ինչ-որ բան փոխել Հայաստանի հետ հարաբերություններում, ապա պետք է օգտվի ամերիկյան ֆինանսավորման ժամանակավոր դադարեցման այս միջանկյալ իրավիճակից և ինքը սկսի ֆինանսավորել հայկական ՀԿ-ներին: Euromedia24-ի հետ զրույցում այսպիսի կարծիք հայտնեց ռուսաստանյան «Եվրասիական գաղափարների արհեստանոց» հիմնադրամի փորձագիտական խորհրդի նախագահ, արտաքին քաղաքականության, պաշտպանության և անվտանգության հարցերի փորձագետ Գրիգորի Տրոֆիմչուկը՝ խոսելով ԱՄՆ արտաքին ֆինանսական աջակցության ծրագրերի ժամանակավոր կասեցման մասին Թրամփի որոշման և USAID-ի հետ կապված միջազգային սկանդալի թեմայի շուրջ:
Ռուսաստանցի փորձագետը նկատեց, որ Արևմուտքից ֆինանսավորվող կազմակերպությունները Հայաստանում բավական շատ են, ընդ որում՝ դրանք ոչ միայն քաղաքական կամ հասարակական կազմակերպություններ են, այլև սոցիալական, տնտեսական, մշակութային և այլ նախագծեր: Ինչ վերաբերում է USAID-ի՝ ԱՄՆ Միջազգային զարգացման գործակալության հարցին, Գրիգորի Տրոֆիմչուկի խոսքով՝ պարզ է, որ Թրամփը չի կարող նախագահական հրամանով փակել այն, և հիմա այնտեղ վերաքննություն, ստուգումներ են անցկացվում՝ ծրագրերը վերանայելու և ֆինանսավորման արդյունավետությունը բարձրացնելու նպատակով: Ռուսաստանցի փորձագետն առաջարկում է Ռուսաստանի ղեկավարությանը օգտվել ստեղծված իրավիճակից և ամրապնդել Հայաստանի հասարակության հետ կապերը:
Գրիգորի Տրոֆիմչուկ. «Մյուս կողմից, եթե հիմա այդպիսի միջանկյալ իրավիճակ է ձևավորվել՝ USAID-ի ղեկավարության փոփոխության, մասնավորապես՝ Հայաստանում կոնկրետ նախագծերի ֆինանսավորման հետ կապված, ապա եթե Ռուսաստանն ուզում է ինչ-որ բան փոխել, խնդրեմ՝ ֆինանսավորեք ձեզ պետքական հայկական կազմակերպություններին: Իրականում հարցը շատ պարզ է դրված՝ կա՛մ դուք եք փող տալիս, կա՛մ նրանք են փող տալիս: Ցանկացած երկրի պարագայում այդպես է: Վերցնենք, օրինակ, Ուկրաինան: Խնդրեմ, եթե դուք դժգոհ եք, որ Արևմուտքը ֆինանսավորում է ինչ-որ կազմակերպություններ Հայաստանում, դուք փող տվեք: Ահա և վերջ»:
Հիշեցնենք, որ Միացյալ Նահանգների նախագահ Դոնալդ Թրամփն իր առաջին իսկ որոշումներից մեկով հրաման է ստորագրել ԱՄՆ արտաքին ֆինանսական աջակցության ծրագրերը 90 օրով կասեցնելու վերաբերյալ: Ավելի ուշ Թրամփի վարչակազմում կառավարության արդյունավետության դեպարտամենտի ղեկավարի պաշտոնը զբաղեցնող Իլոն Մասկը հայտարարեց ԱՄՆ Միջազգային զարգացման գործակալությունը փակելու իր և Թրամփի որոշման մասին: Օրենսդրությունը, սակայն, թույլ չի տալիս նախագահին փակել գործակալությունն առանց Կոնգրեսի հավանության: Այժմ այն անցել է ԱՄՆ Պետդեպարտամենտի կառավարման ներքո: USAID-ն ամերիկյան հումանիտար օգնության դաշնային գործակալությունն է՝ հսկայական բյուջե ունեցող կազմակերպություն, որը տասնամյակներ շարունակ գործում է աշխարհի ավելի քան 100 երկրում, այդ թվում՝ Հայաստանում:
Հեղինակ՝ Արամ Սարգսյան
