Բանակը չի պարտվել, պարտվել է Նիկոլ Փաշինյանն ու իր ղեկավարած թիմը։ Այս մասին լրագրողների հետ զրույցում ասել է ՀՀԿ Երիտասարդական կազմակերպության նախագահ Հենրիխ Դանիելյանը։
«Մեր առյուծ եղբայրները մինչև վերջին վայրկյանը կենաց մահու կռիվ են տվել և անզիջում պայքար են մղել ընդդեմ թուրքական –ալիևյան տեռորիստական ռեժիմի։
Պետք է իշխանափոխություն իրականացնել, այսօրվա իշխանություններն սկսել են հրաժարվել նույնիսկ եկեղեցուց»,– ասաց նա։
Դանիելյանի խոսքով՝ ինչպես այսօրվա իշխանության ներկայացուցիչները խուսափում են ասել Արցախ բառը, այնպես էլ շուտով կհրաժարվեն Եղեռն բառից։«Կապիտուլյանտ իշխանույթունները փորձում են սերմանել այնպիսի հիշողություններ, իբրև թե երբեք չենք ունեցել հաղթանակներ, իբր մենք պարտված ժողովուրդ ենք։
Նիկոլ Փաշինյանին դա չի հաջողվելու»,– նշեց նա՝ հավելելով, որ Եռաբլուրում են որպես կուսակցություն, ում ղեկավարները մասնակցել են Արցախի և Հայաստանի անկախացման գործընթացին։
Նշենք, որ ՀՀԿ Երիտասարդական կազմակերպության անդամներն այցելել են «Եռաբլուր» զինվորական պանթեոն՝ ծաղիկներ խոնարհելու և հարգանքի տուրք մատուցելու Արցախյան պատերազմների զոհերի հիշատակին:
