Լիբանանի դեմ ագրեսիայի դադարեցումը և նրա ինքնիշխանության նկատմամբ հարգանքը պայման են Իսրայելի հետ զինադադարի համաձայնագրի կնքման համար։ Այս մասին հայտարարել է շիական «Հըզբոլլահ» շարժման գլխավոր քարտուղար շեյխ Նաիմ Քասեմը՝ «Al Jadeed» հեռուստաալիքով հեռարձակվող հեռուստաուղերձում։
«Մենք ստացանք բանակցային փաստաթուղթը, ուշադիր կարդացինք այն և արտահայտեցինք մեր մեկնաբանությունները դրա վերաբերյալ, մեր պատասխանը ներկայացվեց ամերիկացի բանագնացին։ Արդյոք դա կհանգեցնի հրադադարի, կախված է Իսրայելի պատասխանից, քանի որ նրա հետ ցանկացած համաձայնություն կախված է երկու պայմանից՝ ագրեսիայի դադարեցում և հարգանք Լիբանանի ինքնիշխանության նկատմամբ»,- ասել է շիա քաղաքական գործիչը։
Քասեմի խոսքով՝ շիա մարտիկները կշարունակեն պայքարել այնքան ժամանակ, քանի դեռ Իսրայելը չի դադարեցնի ռազմական գործողությունները։
«Դիմադրությունը հարձակվելու է թշնամու վրա՝ անկախ նրանից՝ բանակցությունները կհաջողվեն, թե ոչ»,- նշել է քաղաքական գործիչը։
Նա հիշեցրել է, որ «Հըզբոլլահը» նախկինում համաձայնել էր 60-օրյա զինադադարի ամերիկա-ֆրանսիական նախաձեռնությանը, սակայն ի պատասխան Իսրայելը սեպտեմբերի 27-ին սպանեց շարժման նախկին առաջնորդ Շեյխ Հասան Նասրուլլային։
«Մենք երկու տարբերակ ունենք՝ կա՛մ կռվել, կա՛մ հանձնվել»,-ընդգծել է Քասեմը:
Միևնույն ժամանակ նա զգուշացրել է, որ շիա մարտիկները «կհարվածեն Թել Ավիվի կենտրոնին՝ ի պատասխան Բեյրութի յուրաքանչյուր ռմբակոծության»։
Քասեմը հաստատել է, որ «Հըզբոլլահը» բարեկամ պետությունների օգնությամբ կվերակառուցի երկրի հարավում ավերված ավաններն ու քաղաքները։ Նա հավաստիացրել է տուժած բնակչությանը, որ «ամբողջ Լիբանանը կդառնա էլ ավելի գեղեցիկ և ավելի լավը»։
Գլխավոր քարտուղարը նաև հայտարարել է, որ շիական շարժումը «արդյունավետ ներդրում կունենա հանրապետության նոր նախագահի ընտրության գործում»։
