Վրաստանի Կենտրոնական ընտրական հանձնաժողովի նախագահ Գիորգի Կալանդարիշվիլին (Giorgi Kalandarishvili
) ստորագրել է խորհրդարանական ընտրությունների ամփոփիչ արձանագրությունը, տեղեկացնում են վրացական ԶԼՄ-ները։
«Եզրափակիչ արձանագրությունը կազմվել է, ըստ էության, ավարտվել է ընտրական շրջանը»,- ասել է Կալանդարիշվիլին՝ ստորագրելով փաստաթուղթը։
Ինչպես ամփոփիչ նիստում հայտնել է ԿԸՀ քարտուղար Գիորգի Ջավախիշվիլին, իշխող «Վրացական երազանք-Ժողովրդավարական Վրաստան» կուսակցությունը հաղթել է խորհրդարանական ընտրություններում՝ հավաքելով ձայների 53,93 տոկոսը և օրենսդիր մարմնում ստացել 89 մանդատ։
Չորս ընդդիմադիր կուսակցությունները հաղթահարել են 5 տոկոսի արգելքը։
«Փոփոխությունների կոալիցիան» հավաքել է 11,03 տոկոս և ստացել 19 մանդատ, «Միասնություն-Ազգային շարժում»՝ 10,17 տոկոս և 16 մանդատ, «Ուժեղ Վրաստանը»՝ 8,81 տոկոս և 14 մանդատ, «Գախարիան հանուն Վրաստանի»՝ 7,78 տոկոս և 12 մանդատ։
ԿԸՀ նիստը տեղի է ունեցել ընդդիմության և նրա կողմնակիցների բողոքի ֆոնին։
