Իսրայելի ռազմաօդային ուժերն ավարտել են հերթական հարվածների շարքը Լիբանանի մայրաքաղաքի արվարձաններին։ Սա մեկ օրվա ընթացքում հարվածների երրորդ ալիքն է, հայտնում է Իսրայելի բանակի մամուլի ծառայությունը։Հարձակման թիրախ դարձյալ հայտարարվել են շիական «Հըզբոլլահ» կազմակերպության ռազմական օբյեկտները։ Հարվածները հասցվել են հիմնականում Բեյրութի Դահիյա արվարձանին, որտեղ տեղակայված է շիա կազմակերպությունը։
Խոցված թիրախների թվում են եղել «Հըզբոլլահի» հրամանատարական կետերը։ Ըստ իսրայելական կողմի՝ դրանք դիտավորյալ տեղակայվում են քաղաքացիական շենքերի մեջ։ Բանակը հայտարարել է, որ հարվածներ հասցնելուց առաջ «հավելյալ միջոցներ է ձեռնարկել քաղաքացիական անձանց վնաս պատճառելու վտանգը նվազեցնելու համար»:
Սեպտեմբերի 23-ին Իսրայելը սկսեց «Հյուսիսի նետեր» գործողությունը Լիբանանում՝ «Հըզբոլլահի» ուժերի դեմ, որի ընթացքում զանգվածային հարվածներ է հասցնում կազմակերպության ռազմական օբյեկտներին: Հայտարարված նպատակն է՝ ստեղծել անվտանգ պայմաններ Իսրայելի հյուսիսային սահմանային շրջաններում տասնյակ հազարավոր բնակիչների վերադարձի համար։
