Երուսաղեմում հարձակման ենթարկված 9-ամյա հայ տղան պատմել է իր հետ տեղի ունեցածի մասին։
Channel 13 հեռուստաալիքին նա ասել է, որ պղպեղային սփրեյով հարձակումից հետո դպրոց գնալիս սկսել է հեծանվային սաղավարտ կրել՝ վախենալով, որ կարող է կրկին հարձակման ենթարկվել։
«Ես կարծում էի, որ կմեռնեմ»,- ասել է տղան։
Հիշեցնենք, որ Երուսաղեմում Յոմ Կիպուրի տոնի ժամանակ պղպեղային սփրեյ էին ցողել 9-ամյա հայ երեխայի ուղղությամբ։
Իսրայելական Channel 13-ի լրագրող Յոսի Էլին X-ի իր էջում հայտնել էր, որ Վիլյամ անունով տղան հեծանիվ էր վարել Երուսաղեմի Մամիլա թաղամասի մոտ՝ ականջակալներով երաժշտություն լսելով։
Լրագրողի փոխանցմամբ՝ մի խումբ երիտասարդներ սպառնալիքներով մոտեցել էին երեխային և պահանջել հանել ականջակալները, ինչից հետո նրա ուղղությամբ պղպեղային սփրեյ էին ցողել։
Յոսի Էլին հրապարակել էր նաև կադրեր, որոնցում երեխան շտապօգնության մեքենայում բուժօգնություն էր ստանում։ Նա հարձակվողներին ներկայացրել էր որպես հրեա ծայրահեղականներ։
Լրագրողի տեղեկություններով՝ սա երեխայի նկատմամբ երկրորդ հարձակումն էր։ Առաջին դեպքի ժամանակ Վիլյամի հետ եղել էր հայրը և պաշտպանել նրան, իսկ երկրորդ անգամ երեխան միայնակ էր եղել։
Վիլյամի մայրը լրագրողին պատմել էր, որ դեպքից հետո որդին դժվարությամբ է քնում և վախենում է արտաքինից հրեա կրոնավորների նմանվող անձանցից։
Յոսի Էլին նաև պնդել էր, որ միջադեպն արձանագրվել է անվտանգության տեսախցիկներով, սակայն ոստիկանությունը գործը փակել է՝ որևէ մեկին չձերբակալելով։
Վերջին ամիսներին Երուսաղեմի հայկական թաղամասում հայ համայնքի և եկեղեցական կառույցների դեմ ուղղված այլ միջադեպեր ևս են արձանագրվել։
Օգոստոսի 2-ին ոստիկանությունը ձերբակալել էր վեց կրոնավոր հրեաների՝ հինգ անչափահասի և մեկ չափահասի, որոնք, ըստ ոստիկանության, հարվածել էին Սրբոց Հակոբյանց վանքի մուտքի դռանը և քարեր նետել վանական համալիրի ուղղությամբ։
Երեք կասկածյալի մուտքը Հին քաղաք ժամանակավորապես արգելվել էր, իսկ մյուս երեքի կալանքը երկարացնելու միջնորդություն էր ներկայացվել դատարան։ Ոստիկանությունը հայտարարել էր, որ խստորեն է վերաբերում բռնության և ռասիզմի դրսևորումներին։
