Չինաստանում ուժի մեջ են մտել նոր կանոններ, որոնք ընդլայնում են քաղաքացիների՝ արտերկիր մեկնելը սահմանափակելու հիմքերը։ Այս մասին հայտնում է BBC-ն։
Նոր կարգի համաձայն՝ իշխանությունները կարող են քաղաքացիներից պահանջել ներկայացնել ուղևորության նպատակի և երթուղու վերաբերյալ տեղեկություններ։ Կեղծ փաստաթղթեր ներկայացնելու, սուտ տեղեկություններ տրամադրելու և այլ խախտումների դեպքում կարող է մինչև երեք տարով արգելվել երկրից մեկնելը։
Պեկինը պնդում է, որ նոր կանոնները չեն սահմանափակում սովորական ուղևորությունները։ Ըստ իշխանությունների՝ դրանք նպատակ ունեն նվազեցնել վտանգավոր տարածաշրջաններում քաղաքացիներին սպառնացող ռիսկերը, ինչպես նաև պայքարել արտերկրում խարդախությունների, ապօրինի մոլախաղերի և հանցավորության դեմ։
Միևնույն ժամանակ փորձագետները նշում են, որ ուժեղանում է քաղաքացիների, ինչպես նաև ազգային անվտանգության հետ առնչվող մասնագետների և տեխնոլոգիաների տեղաշարժի նկատմամբ վերահսկողությունը։
Սահմանափակումներն արդեն տարածվել են նաև մասնավոր հատվածի վրա։ Մասնավորապես՝ արտերկիր մեկնելու համար թույլտվություն է պահանջվել Alibaba-ի և DeepSeek-ի արհեստական բանականության համակարգերի մշակմամբ զբաղվող մասնագետներից։
Safeguard Defenders իրավապաշտպան կազմակերպության տվյալներով՝ երկրից մեկնելու արգելքի վերաբերյալ որոշումների թիվը կտրուկ աճել է՝ 2016 թվականի 89-ից հասնելով 188 760-ի՝ 2025 թվականին։
Ընդ որում՝ բազմաթիվ քաղաքացիներ իրենց նկատմամբ կիրառված սահմանափակման մասին տեղեկանում են միայն այն ժամանակ, երբ փորձում են հատել երկրի սահմանը։
