«Եվրոմեդիա 24»-ի զրուցակիցն է ԱԺ «Քաղաքացիական պայմանագիր» խմբակցության նախկին պատգամավոր Գագիկ Մելքոնյանը։
— Պարոն Մելքոնյան, բանակում ոչ մարտական պայմաններում մահերի քանակն անհանգստացնող է։ Ինչպե՞ս եք պատկերացնում այդ հարցի լուծումը։
— Լուծումը մի քիչ բարդ է, որովհետև դա միայն սպայական կազմից չէ կախված, դա կախված է բոլորից՝ սկսած դպրոցից, քոլեջից և բոլոր տեղերից։ Դաստիարակչական աշխատանքը բոլոր տեղերում պետք է լինի։ Կարող ենք այս կամ այն հրամանատարին պատժել, բայց դեպքերը նորից շարունակվում են։ Բարքերը պետք է վերանան։ Այդ գողական կամ սուտ գողական բարքերը դրսից են գալիս, ներսից չեն գալիս։ Բոլորս միասին պետք է այս գործին լծվենք, որպեսզի կարողանանք այս դեպքերը կանխել
։— Իսկ իշխանության պատասխանատվությունը մասին ի՞նչ կասեք։ Ինչպե՞ս եք վերաբերվում Ռազմական ոստիկանության պետի պաշտոնանկությանը։
— Պետք է բոլորն իրենց տեղում լինեն։ Եթե իրենց տեղում չեն, նշանակում է՝ ինչ-որ բան այն չէ։ Ամեն մեկն իր տեղում պետք է պատասխան տա։
— Աշոտ Զաքարյանն իր տեղո՞ւմ էր։
— Աշոտ Զաքարյանը ՌՈ պետն էր, բայց աշխատանքը բոլոր տեղերում պետք է լինի։
— Իսկ Արամ Հովհաննիսյանի նշանակումն ինչպե՞ս եք գնահատում։ Նա կկարողանա՞ համակարգային հարցեր լուծել։
— Նորից եմ ասում՝ բոլորս պետք է զբաղվենք այդ խնդրով։ Ծնողը մեծացնում է զավակին, ուղարկում է բանակ, իսկ այնտեղ մի բաշիբոզուկ կարող է մարդու կյանք խլել։ Մեծ աշխատանք է պետք անել։
— Ժամանակին, երբ նման միջադեպեր էին լինում, լրագրող Նիկոլ Փաշինյանը մեղավորության սլաքներն ուղղում էր այն ժամանակվա նախարար Վազգեն Սարգսյանի վրա։ Սուրեն Պապիկյանը մեղավորություն չունի՞։
— Դա մի անձից կախված չէ։ Եթե Պապիկյանը պաշտոնանկ արվի, կվերանա՞ այդ ամենը։ Բոլորը պետք է աշխատեն։ Ի՞նչ երեխա եք ուղարկում բանակ, քաղաքացիական կյանքում ինչպիսի՞ն է եղել, ինչո՞վ է զբաղվել։ Հրամանատարը նաև պետք է հոգեբան լինի, նա պետք է դաստիարակչական աշխատանք տանի։ Այդ հարցերը հիմա բարձիթողի վիճակում են։
— Ստացվում է՝ անարդա՞ր էր, երբ լրագրող Փաշինյանը թիրախավորում էր Վազգեն Սարգսյանին։
— Դուք էլ Պապիկյանին եք թիրախավորում, ի՞նչ տարբերություն։
— Ես չեմ թիրախավորում, ես Ձեր կարծիքն եմ փորձում պարզել։
— Դուք էլ ունեք գործ, մենք բոլորս պարտավոր ենք աշխատել, որ այդ բարքերը վերանան։
— Իսկ նոր խորհրդարանի բարքերին ի՞նչ գնահատական կտաք, շա՞տ է տարբերվում նախորդ ԱԺ-ից, երբ Դուք պատգամավոր էիք։
— Տարբերվում է նրանով, որ նախորդը ծածուկ էր պաշտպանում ուրիշ երկրի շահերը, հիմա՝ բացեիբաց։ Այսօրվա ընդդիմությունը դարձել է Պետդումայի քույր կազմակերպությունը։
— Ինչո՞ւ ՔՊ-ն որոշեց փոխել ԱԺ պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանին՝ այդ պաշտոնում առաջադրելով Վիլեն Գաբրիելյանի թեկնածությունը։ Ո՞վ է Ձեզ համար նախընտրելի։
— Ինձ համար նախընտրելի է Անդրանիկ Քոչարյանը, բայց նա չի առաջադրվել։
— Այսինքն՝ Վիլեն Գաբրիելյանը չի՞ կարողանա արժանի փոխարինող լինել։
— Կաշխատի, կերևա։ Մարդը պետք է աշխատի, որ հասկանաս՝ կարո՞ղ է, թե՞ ոչ։ Ցանկացածն էլ կարող է աշխատել, ի՞նչ է եղել։
