Օգոստոսի 17-ին՝ Օշականի ճակատամարտի 199-րդ տարելիցի օրը, Հայաստանում Ռուսաստանի դեսպան Սերգեյ Կոպիրկինը մասնակցել է Արմավիրի մարզում գտնվող «Օշականի հերոսներին» նվիրված հուշահամալիրի մոտ անցկացվող ավանդական հիշատակի միջոցառմանը։
1827 թվականի օգոստոսի 17-ին տեղի է ունեցել ռուս-պարսկական պատերազմի ամենաարյունալի ճակատամարտերից մեկը։ Գեներալ-լեյտենանտ Աֆանասի Կրասովսկու՝ 3000-ից պակաս զինվոր ունեցող ջոկատը հայկական աշխարհազորայինների հետ միասին, մարտերով ճեղքելով պարսկական բանակի բազմակի գերազանցող ուժերի դիմադրությունը, կարողացել է հասնել պաշարված Էջմիածնի վանքին։
«Այսօր, այս պատմական տարելիցի առիթով, մենք հիշում ենք ոչ միայն ռուսական զենքի քաջությունը, այլև այն, որ այս ճակատամարտում ռուսական եգերների և կազակների կողքին անձնվիրաբար կռվել են հայ կամավորականները։ Տեղի հայ բնակչությունը հակառակորդի կրակի տակ ռուս զինվորներին ջուր էր հասցնում, ինչպես նաև օգնություն էր ցուցաբերում վիրավորներին»,- իր ելույթում նշել է Ռուսաստանի դեսպանը։
Միջոցառմանը մասնակցել են Հայաստանում Ռուսաստանի դեսպանության պաշտպանության հարցերով կցորդի գրասենյակի աշխատակիցներ, Հայաստանում «Ռոսսոտրուդնիչեստվոյի» ներկայացուցչության, Երևանում Մոսկվայի տան, Հայաստանում Ռուսաստանի ԱԴԾ սահմանապահ վարչության, 102-րդ ռուսական ռազմաբազայի և «Էրեբունի» ավիաբազայի ղեկավարությունը։
Միջոցառմանը ներկա են եղել նաև Հայաստանում Բելառուսի դեսպանության դիվանագետներ, Ռուս ուղղափառ և Հայ Առաքելական եկեղեցիների հոգևորականներ, հայրենակիցների կազմակերպությունների ներկայացուցիչներ և հասարակական գործիչներ։
