«Հրապարակ»-ը գրում է.Բաքվից ՀՀ Սահմանադրությունը փոխելու եւ Արցախի հարցը վերջնականապես փակելու պահանջներին զուգահեռ, ակտիվություն են դրսեւորում նաեւ արցախցի քաղաքական գործիչները։ Մեր տեղեկություններով, հուլիսի վերջերին բուռն քննարկումներ են տեղի ունեցել Արցախի ներկայացուցչությունում, որին մասնակցել են Արցախի պետական պաշտոնյաներ, հանրային գործիչներ, պառլամենտականներ։
Հանդիպման օրակարգում երկու հարց է քննարկվել` Արցախի նախագահի եւ Արցախի ԱԺ նախագահի ընտրության հարցը։Հիշեցնենք, որ Արցախի ԱԺ նախագահ Աշոտ Դանիելյանը, որը նաեւ կատարում էր նախագահի պարտականությունները, հուլիսի 2-ին պաշտոնից հրաժարական ներկայացրեց։ Նա հայտարարել էր, որ որոշումը կայացրել է «երկար մտորումներից, քննարկումներից եւ վերջին օրերի խորհրդակցություններից» հետո, ընդգծել էր, որ պաշտոնը ստանձնել էր պետական ինստիտուտների շարունակականությունն ապահովելու նպատակով, սակայն նշել էր, որ անհրաժեշտ միասնականության եւ ընդհանուր պատասխանատվության բացակայության պայմաններում մեկ կամ մի քանի անձինք չեն կարող շարունակաբար կրել ամբողջ բեռը։
Դանիելյանն Արցախի ԱԺ նախագահի պաշտոնը ստանձնել էր 2025 թվականի մայիսի 21-ին՝ փոխարինելով Բաքվում գերեվարված Դավիթ Իշխանյանին։ Իսկ դրանից հետո, երբ լրացան նախագահի լիազորությունները, եւ Շահրամանյանը թեկնածություն չառաջադրեց, նախագահի պարտականություններն էլ անցան Դանիելյանին։ Ինչեւէ, ստացվում է, որ Դանիելյանի հրաժարականի արդյունքում երկու պաշտոն թափուր է մնացել, եւ վտանգված է ԱՀ պետական ինստիտուտների շարունակականության հարցը։
Մեզ պատմեցին, որ հուլիսի վերջերին տեղի ունեցած քննարկմանը ներկա են եղել պետնախարար Նժդեհ Իսկանդարյանը, հասարակական գործիչ Անաստաս Իսկանդարյանը, այլ գործիչներ, պատգամավորներ, սակայն հատկապես ակտիվ են եղել նշված երկուսը՝ պահանջելով խորհրդարանից՝ օր առաջ լուծել թափուր պաշտոնները համալրելու հարցը, ավելին` Սամվել Բաբայանի երբեմնի թիմակից Գագիկ Բաղունցն ԱՀ նախագահի պաշտոնում ներկայացրել է Նժդեհ Իսկադարյանի թեկնածությունը, սակայն խորհրդարանականները քաղաքակիրթ մերժել են` շեշտելով, որ պետք է այնպիսի պայմաններ ստեղծել, որ Արցախի նախագահին ընտրի ժողովուրդը՝ արցախցիները, դա է միակ լեգիտիմ ճանապարհը։
Իսկ ԱԺ նախագահի պաշտոնն էլ սույն աձը չի կարող զբաղեցնել, քանի որ, Արցախի գործող իրավակարգավորումների համաձայն, ԱԺ նախագահի թեկնածու կարող են առաջադրվել եւ նախագահ կարող է ընտրվել խորհրդարանի պատգամավորներից մեկը։ Ավելի վաղ գրել էինք, որ խորհրդարանականներից որեւէ մեկը չի ցանկանում պատասխանատվություն ստանձնել՝ հաշվի առնելով ՀՀ իշխանություններից եկող վտանգները։Այդուհանդերձ, արցախցիները որոշել են օգոստոսի 18-ին կրկին հավաքվել Արցախի ներկայացուցչությունում եւ բոլոր խմբակցությունները հանդես գան իրավիճակի վերաբերյալ հստակ ծրագրով, իրենց տեսլականով, թե ով ինչպես է պատկերացնում հարցի լուծումը, եւ, որ ամենակարեւորն է, պետք է անհապաղ լուծում տալ եւ խորհրդարանի խոսնակ ընտրել։
Մեզ ասացին, որ գլխավոր ինտրիգն այն է, որ պետք է լինի անառարկելի թեկնածու, որը կկարողանա կոնսենսուս ձեւավորել, խնդիրը միայն մեկ օրվա ընտրությունը, 17 մանդատը չեն, այլ այն, որ դրանից հետո էլ տվյալ մարդը կարողանա նիստեր հրավիրել, քվորում ապահովել, որոշումներ ընդունել։ՀԳ․ Երեկ ծագումով արցախցի փաստաբան Ռոման Երիցյանը հայտարարությամբ հանդես եկավ. «Հայաստանում Արցախի Հանրապետության մշտական ներկայացուցչության շենքից Արցախին սեփականազրկելու վերաբերյալ վճռի դեմ իմ ներկայացրած վերաքննիչ բողոքը Վերաքննիչ վարչական դատարանը որոշել է քննել գրավոր ընթացակարգով, իսկ դատական ակտի հրապարակումը նշանակել է սույն թվականի նոյեմբերին։
Այս արագությունը Վերաքննիչ վարչական դատարանի համար պարզապես կայծակնային է... Մենք իրավունք չունենք լուռ հետեւելու, թե ինչպես է Արցախը տարածքային կորստից եւ բռնի տեղահանումից հետո, հիմա արդեն նաեւ Հայաստանում զրկվում իրեն պատկանող վերջին գույքից ու ինստիտուցիոնալ ներկայությունից։Չի՛ կարելի թույլ տալ, որ Արցախը վերջնականապես սեփականազրկվի։
Չի՛ կարելի թույլ տալ, որ քայլ առ քայլ վերացվեն Արցախի պետականության վերջին հետքերը։Չի՛ կարելի թույլ տալ, որ մի օր պարզապես արձանագրենք՝ Արցախն այլեւս ոչինչ չունի»:
