Հուլիսի 11-ին Արարատի մարզում տեղի է ունեցել ավտովթար-հրդեհ՝ բեռնատարի մասնակցությամբ։
shamshyan,com-ի տեղեկություններով Ժամը 15։20-ի սահմաններում Երևան-Երասխ ավտոճանապարհի՝ Երասխ գյուղի վարչական տարածքում, բեռնատար ավտոմեքենան դուրս է եկել երթևեկելի գոտուց, հայտնվել ծիրանի այգում և բռնկվել։ Պատահարի հետևանքով վարորդը մարմնական վնասվածքներով տեղափոխվել է «Արարատ» բժշկական կենտրոն։
Դեպքի վայր է ժամանել ՀՀ ներքին գործերի նախարարության փրկարար ծառայության Արարատի հրշեջ-փրկարարական ջոկատի մեկ մարտական հաշվարկ, որը մարել է հրդեհը, սակայն մեքենան ամբողջությամբ մոխրացել է։ Տարածքը սահմանազատել են ՀՀ ՆԳՆ ոստիկանության Պարեկային ծառայության Արարատի մարզի գումարտակի 2-րդ վաշտի պարեկները՝ գումարտակի հրամանատարի պարտականությունները կատարող Հայկ Հակոբյանի, գումարտակի ծառայության ավագ տեսուչներ Սահակ Թադևոսյանի, Արթուր Կոծինյանի, վաշտի հրամանատար Վահան Սանթելյանի և վաշտի հրամանատարի տեղակալ Հովհաննես Մանսուրյանի գլխավորությամբ։
ՊԾ Արարատի մարզի գումարտակից պատահարի մասին տեղեկացրել են ՀՀ Քննչական կոմիտեի Արարատի մարզային քննչական վարչության Վեդիի քննչական բաժին։ Այնտեղից ժամանել է քննչական խումբը՝ վարչության պետ Գագիկ Առաքելյանի, վարչության պետի տեղակալ Ներսես Մուրադյանի և օրվա հերթապահ քննիչի գլխավորությամբ։ Դեպքի փաստով Վեդիի քննչական բաժնում նախաձեռնվել է քրեական վարույթ, որի շրջանակներում պարզվում են մեքենայի մակնիշն ու վիրավորում ստացած վարորդի ինքնությունը։ Բռնկված կրակն ու ծուխը տեսանելի են եղել մի քանի կիլոմետրից։
