Գործարկվել է քոլեջներ ընդունելության նոր կարգը, և ըստ այդմ՝ այսօր առավոտյան ժամը 9-ից մեկնարկել է ընդունելության գործընթացը: «Արմենպրես» լրատվական գործակալության մամուլի կենտրոնում տեղի է ունեցել մամուլի ասուլիս՝ նվիրված քոլեջների ընդունելության նոր կարգին: Ասուլիսի բանախոսներն էին ԿԳՄՍ նախարարի տեղակալ Արաքսյա Սվաջյանը և Կրթական տեխնոլոգիաների ազգային կենտրոնի տնօրեն Արտակ Պողոսյանը:
Ներդրվել է հայտագրման պարզ գործընթացԿրթությանը վերաբերող գործընթացների թվայնացմանն ուղղված աշխատանքների շրջանակում այս տարի իրականացվել է փոփոխություն մասնագիտական ուսումնական հաստատությունների ընդունելության ընթացակարգերում՝ ներդնելով տվյալների ճշգրտությունն ապահովելու նոր հնարավորություններ: Դիմորդների տվյալները և անհրաժեշտ փաստաթղթերը ներբեռնվելու են ինքնաշխատ եղանակով՝ ազատելով դրանք գերատեսչություններից հավաքագրելու անհրաժեշտությունից:«Ընդհանուր առմամբ՝ այս տարի հատկացված տեղերի քանակի հետ կապված մեծ փոփոխություններ չունենք. պահպանվել են նախորդ տարիների մոտավոր ցուցանիշները:
Ընդունելության ցուցանիշները տարեցտարի բարելավվում են՝ ամեն տարի քոլեջների ընդունելության արդյունքներում գրանցելով 10%-ից ավելի աճ»,- ասել է Արաքսիա Սվաջյանը:
Հատկացված տեղերի մասինԱյս տարվա համար միջին մասնագիտական կրթական ծրագրերով հատկացվել է 6064 տեղ, արհեստագործական կրթական ծրագրերով՝ 3312 տեղ և 800 տեղ՝ Ներքին գործերի նախարարության ծրագրերի շրջանակում:Միջին մասնագիտական կրթական ծրագրերով կրթություն կիրականացվի 107 մասնագիտությամբ, որոնցից 15-ը՝ գերակա ուղղությամբ՝ բարձր կրթաթոշակով։ Արհեստագործական կրթական ծրագրով կրթություն կկազմակերպվի 38 մասնագիտությամբ, որոնցից 21-ը՝ գերակա ոլորտներով՝ բարձր կրթաթոշակով։Հայտագրման գործընթացի մասինՀայտագրումը, ըստ ԿՏԱԿ տնօրեն Արտակ Պողոսյանի, տեղի է ունենում նույն համակարգով, ինչ առաջին դասարանների և ավագ դպրոցների պարագայում:
«Գործում է միասնական էջ՝ my.emis.am, որտեղ ծնողը կարող է ստեղծել իր անհատական հաշիվը։ Մեկ հաշվից ծնողը կարող է ունենալ տարբեր գործիքների համար մուտք և այդ հաշվում կատարել իր գործողությունները: Այսօր՝ ժամը 9-ից, բացվել է ՄԿՈՒ հաստատություններ հայտագրման ենթահամակարգը, և ծնողները, մուտք գործելով այնտեղ, կարող են իրենց երեխաներին հայտագրել նախընտրելի ուսումնական հաստատություն: Մրցույթի ամփոփումից հետո նույն էջում կստանան պատասխան»,- ասել է Արտակ Պողոսյանը՝ հավաստելով, որ որևէ տեխնիկական կամ ծրագրային խնդիր չի արձանագրվել:Օրվա առաջին կեսի դրությամբ արդեն 500 դիմում հայտ է ներկայացվել, ինչը նախորդ տարիների համեմատ գրեթե կրկնակի է:
Համակարգով դիմելիս ծնողների համար տեսանելի է, թե պետությունը տվյալ մասնագիտության համար որքան անվճար և վճարովի տեղ է հատկացրել, տվյալ մասնագիտության համար արդեն իսկ քանի դիմում կա: Քոլեջների ընդունելությունը մրցույթային կարգով է տեղի է ունենում, և դիմելու ժամկետները հստակ սահմանված են կարգով. դիմում-հայտերի ընդունման որևէ սահմանափակում չկա: ԺամկետներԱյսօրվանից բացված հայտերի ընդունումը ոչ ոլորտային մասնագիտությունների համար բաց է լինելու մինչև օգոստոսի 10-ը, իսկ ոլորտային մասնագիտությունների համար /բժշկության, մշակույթի և սպորտի ուղղություններ/, որոնց ընդունելությունը նաև քննությունների միջոցով է կազմակերպվում, մինչև հուլիսի 24-ը։
«Այս ժամանակահատվածում ծնողները, ինչպես նաև չափահասների դեպքում քաղաքացիները՝ հենց իրենք, կարող են ցանկացած օր, ցանկացած ժամի իրենց հայտը ներկայացնել: Հայտերի ամփոփումը տեղի է ունենալու միայն հայտագրման ժամկետի ավարտից հետո՝ բոլոր դիմորդների տվյալների ուսումնասիրության արդյունքում։ Հետևաբար, այստեղ խուճապի մատնվելու և գործողությունները շատ արագ կազմակերպելու որևէ խնդիր չկա, սակայն սահմանված ժամկետները պետք է պահպանել»,- ասել է Արաքսիա Սվաջյանը:
Հայտագրման համակարգը ճկուն է, և դիմորդը ցանկացած պահի կարող է մինչև սահմանված ժամկետը այն չեղարկել և նոր հայտ գրանցել:Թվայնացման առավելությունները«Թվայնացումն ունի երկու նպատակ. դրանցից մեկը մեր քաղաքացիների և հատկապես երեխաների կրթության ընթացքին հետևելու և դա մշտադիտարկելու հնարավորությունն է: Ինչպես հայտնի է, միջնակարգ կրթությունը մեր երկրում պարտադիր է, և հիմնական դպրոցի ավարտից հետո երեխաները պետք է որոշում կայացնեն, թե իրենց կրթությունը որտեղ են շարունակելու՝ ավագ դպրոցում, թե քոլեջներում: Եվ սա մեզ համար մի գործիք է, որով շատ արագ կկարողանանք նույնականացնել այն երեխաներին, որոնք պարտադիր կրթությունից դուրս կմնան։ Ինքնաշխատ եղանակով բոլոր այն երեխաները, որոնք դպրոցահասակ են և սեպտեմբեր ամսին ընդունված չեն լինի կամ ավագ դպրոցներ կամ քոլեջներ, կհամարվեն կրթությունից դուրս մնացած: Այս իրավիճակում մեր գործընկերների հետ միասին կկազմակերպվեն համապատասխան քայլեր, որպեսզի այս երեխաները հայտնաբերվեն և ուղղորդվեն կրթական համակարգ»,- մեկնաբանել է ԿԳՄՍ նախարարի տեղակալը: ԿՏԱԿ-ի տնօրեն Արտակ Պողոսյանի հավելմամբ՝ թվայնացումն ապահովում է նաև առավելագույն թափանցիկություն՝ դիմորդի համար ապահովելով ուսումնական հաստատությունների թափուր տեղերն ու ընձեռած հնարավորությունները: Թվայնացվում են նաև կրթությանը վերաբերող բոլոր փաստաթղթերը, ինչը հնարավորություն է տալիս նույնականացնել սովորողին:
Թվայնացումը տեսանելի է դարձնում նաև տարբեր տիպի պետական ծրագրերից օգտվելու հնարավորությունները՝ այդպիսով կողմնորոշելու սովորողին ցանկալի հաստատություն դիմելու հարցում: Գործընթացը լինելու է շարունակական:Ինչով է պայմանավորված դեպի ՄԿՈւ հաստատություններ հետաքրքրության աճըԱրաքսիա Սվաջյանը հիշեցրել է՝ Կառավարությունը որոշ ոլորտներ՝ արդյունաբերություն, գյուղատնտեսություն, շինարարություն, ճանաչել է գերակա։ Այս ուղղությամբ կրթություն ստացող շրջանավարտներին առաջարկվում է 50.000 դրամի չափով կրթաթոշակ: Առաջին կուրսում բոլոր ուսանողները ստանում են կրթաթոշակ, այնուհետև առաջին տարվա արդյունքներն ամփոփելուց հետո կրթաթոշակը պահպանվում է՝ ըստ առաջադիմության:Արաքսիա Սվաջյանի իրազեկմամբ՝ պարբերաբար վերանայվում է քոլեջներում դասավանդվող մասնագիտությունների ցանկը, որովհետև կան մասնագիտություններ, որոնք այլևս ժամանակավրեպ են, և դրանց կարիքը տնտեսությունը և աշխատաշուկան չունեն: Կան նաև մասնագիտություններ, որոնց պահանջարկը տարեցտարի աճում է, օրինակ՝ արևային էներգիայի սարքերի, կաթիլային ոռոգման համակարգերը սպասարկողների մասնագիտությունները։
Ըստ նրա՝ կարևոր խթան է նաև պետության հետևողական քաղաքականությունը՝ պարտադիր կրթությունից դուրս մնալու ռիսկերի կանխման նպատակով, ինչի արդյունքում սովորողները պարտադիր որևէ հաստատությունում կրթություն են ստանում:
Երրորդ ամենակարևոր գործոնը մասնագիտական կրթության գրավչության բարձրացումն է որակի առումով. «Այստեղ մեծ աշխատանք է իրականացվում մասնավոր հատվածի հետ, քանի որ այս ոլորտում գործատուների հետ համագործակցությունը շատ կարևոր է: Մենք տարեցտարի ունենում ենք ավելի մեծ թվով կրթական ծրագրեր, որոնք իրականացվում են աշխատանքի վրա հիմնված ուսուցման ծրագրերով, գործատուների հետ համագործակցությամբ, ինչն ավելի հետաքրքրական ու գրավիչ է դարձնում մասնագիտական կրթությունը մեր երիտասարդների համար»:Արաքսիա Սվաջյանը կարևորել է նաև Հանրակրթության պետական չափորոշչով 8-րդ դասարանում ներդրված մասնագիտական կողմնորոշման խմբակի դերը, որի շրջանակում դպրոցականները գիտելիք են ստանում պահանջված մասնագիտությունների մասին:
Ի լրումն՝ ավագ դպրոցներ ընդունելության վերաբերյալԱրաքսիա Սվաջյանը հիշեցրել է՝ ավագ դպրոցների ընդունելությունը ևս այս տարի էլեկտրոնային ձևաչափով է իրականացվելու՝ կրկին թափանցիկություն ապահովելու և ծնողների համար գործընթացն ավելի պարզեցնելու նպատակով՝ https://my.emis.am/ հարթակի միջոցով: «Հուսով եմ՝ ինչպես այսօր բարեհաջող մեկնարկել ենք քոլեջների ընդունելության գործընթացը, այնպես էլ ավագ դպրոցների ընդունելության գործընթացը ևս կկարողանանք սահուն և անխափան իրականացնել»,- խոսքը եզրափակել է ԿԳՄՍ նախարարի տեղակալը։
