Թուրքիայի նախագահ Ռեջեփ Թայիփ Էրդողանը կրկին ընդգծել է հանրապետության համար նոր սահմանադրություն պատրաստելու և ընդունելու անհրաժեշտությունը։
«Մենք հնարավորություն ունենք մեր ժողովրդավարությունը կառուցելու ներքևից վերև՝ նոր, համապարփակ, լիբերալ և քաղաքացիական սահմանադրությամբ», – ասել է Թուրքիայի առաջնորդը։
Էրդողանը նշել է, որ Թուրքիային անհրաժեշտ է հիմնական օրենք, որը միաժամանակ կապահովի ժողովրդավարության, օրենքի գերակայության և քաղաքացիների շահերի պաշտպանությունը։
Թուրքիայի առաջնորդը նաև վստահություն է հայտնել, որ նոր սահմանադրության ընդունումը թույլ կտա հանրապետությանը հասնել «ավելի բարձր իրավական տրամաբանության», որը կարող է ապահովել պետության, օրենքի և հասարակության միջև հավասարակշռություն։
Էրդողանը բազմիցս հայտարարել է, որ Թուրքիային անհրաժեշտ է նոր սահմանադրություն՝ երկրի հետագա զարգացումը երաշխավորելու համար, և սահմանադրության նոր տարբերակի վրա աշխատանքները շարունակվում են։ Թուրքիայի առաջնորդը կոչ է արել բոլոր քաղաքական ուժերին ակտիվորեն մասնակցել նոր սահմանադրության մշակմանը։ Ավելին, Էրդողանը նշել է, որ Թուրքիայի գործող սահմանադրությունը, որն ընդունվել է 1982 թվականին, այլևս չի համապատասխանում ժամանակակից մարտահրավերներին՝ չնայած մի շարք փոփոխություններին։
