Ինդոնեզիան իրավունք է վերապահում ցանկացած պահի դադարեցնել իր մասնակցությունը Գազայի հատվածում միջազգային կայունացման ուժերին, եթե նրա գործունեությունը հակասի երկրի արտաքին քաղաքականությանը, հայտարարել է երկրի արտաքին գործերի նախարարությունը։
Խոսքը վերաբերում է Միջազգային կայունացման ուժերին (ISF), որոնց ստեղծման առաջարկը ներկայացրել է ԱՄՆ նախագահ Դոնալդ Թրամփը։ Արտաքին գործերի նախարարության տվյալներով՝ Ջակարտան պատրաստում է զորակազմ ուղարկել Գազա հնարավոր տեղակայման համար, սակայն արդեն սահմանել է այսպես կոչված «ազգային վերապահումները», որոնք սահմանափակում են ուժերի մանդատը։
«Մենք կարող ենք դադարեցնել առաքելությունը ցանկացած պահի։ Ինդոնեզիան կդադարեցնի իր մասնակցությունը, եթե ISF-ի իրականացումը շեղվի մեր «ազգային վերապահումներից» կամ հակասի երկրի արտաքին քաղաքականությանը», - ասվում է Ինդոնեզիայի արտաքին գործերի նախարարության հայտարարության մեջ։
