Բժշկական օգնության կարիք ունեցող պաղեստինցիների խումբը 2025 թվականի փետրվարից ի վեր առաջին անգամ «Ռաֆահ» անցակետով հատել է Գազայի հատվածի և Եգիպտոսի միջև սահմանը։ Այս մասին հայտնել է եգիպտական «Ալ-Կահիրա ալ-Իխբարիա» հեռուստաալիքը։
Դրա տեղեկություններով՝ տուժածներին ուղեկցել են նրանց հարազատները, և բոլորը տեղում կարճատև բժշկական զննությունից հետո կուղեգրվեն Հյուսիսային Սինայի նահանգի հիվանդանոցներ։ Տվյալներ այն մասին, թե «Ռաֆահ» սահմանային անցակետի աշխատանքի առաջին օրը որքան Գազայի բնակիչ է մուտք գործել Եգիպտոսի տարածք, առայժմ չկան։
Սակայն հեռուստաալիքը նշել է, որ նախնական տվյալներով, արտասահմանում բուժման կարիք ունի մոտ 22 հազար պաղեստինցի։
