Այսօր ՀՀ քննչական կոմիտե են կանչվել Գուգարաց թեմի առաջնորդ Հովնան եպիսկոպոս Հակոբյանը, Սյունյաց թեմի առաջնորդ Մակար եպիսկոպոս Հակոբյանը և տեր Մովսես քահանան։ Լրագրողների հետ զրույցում այս մասին հայտնեց փաստաբան Արմինե Ֆանյանը` հավելելով, որ նրանցից 2-ը՝ Հովնան սրբազանը և Մակար սրբազանը, կանչվել են մեղադրյալի կարգավիճակով:
Նա հաստատեց, որ իր պաշտպանյալները քննչական կոմիտե են կանչվել Մասյացոտնի թեմի նախկին առաջնորդ Արման (Գևորգ) Սարոյանի «գործով»։
Փաստաբանը կարծում է, որ այսօրվա հարցաքննությունից հետո նրանց նկատմամբ խափանման միջոց կընտրվի։Անդրադառնալով նախկինում Գևորգ սրբազանի, այժմ՝ Արման Սարոյանի հայցի վերաբերյալ կայացրած որոշմանը՝ Ֆանյանն ասաց, որ դատարանն այնպիսի որոշում է կայացրել, որ նախկինում երբևէ չի կայացրել։«Մենք կարծում ենք, որ նպատակը Եպիսկոպոսաց ժողովը տապալելն է, որովհետև սրբազանները ծանուցվել են միանգամից մեղադրյալի դատավարական կարգավիճակով։
Սա եզակի բան է։
Նշանակում է, որ արդեն քրեական հետապնդում հարուցելու որոշում կա, բնականաբար կընտրվեն խափանման միջոցներ։ Իհարկե հոդվածի սանկցիան թույլ չի տալիս, որ կալանքը որպես խափանման միջոց կիրառելու միջնորդություններ ներկայացվեն, քանի որ ոչ մեծ ծանրության հանցագործության մասին է խոսքը, բայց ենթադրում եմ` ազատ տեղաշարժի սահմանափակումներ կլինեն»,– ասաց նա։Ֆանյանն ընդգծեց` քննչական մարմինն այս պահին գործիք է իշխանության ձեռքին։
Ավելի վաղ հայտնել էինք, որ այսօր առավոտից Քննչական կոմիտե են կանչվել Գերագույն Հոգևոր Խորհրդի անդամները, որոնց որոշմամբ կարգալույծ էր հռչակվել Արման Սարոյանը։Euromedia24–ի տեղեկություններով՝ ՔԿ-ն նրանց ուղարկել է ծանուցագրեր՝ ներկայանալու 15։00-ին՝ մեղադրյալի կարգավիճակով։Քննչական կոմիտեն այն հարցին, թե ինչ հիմքով են կանչվել հարցաքննության, պատասխանեցին, որ հարցաքննությունների վերաբերյալ տեղեկություն չեն տրամադրում։
