Վրաստանի նախկին վարչապետ Գիորգի Գախարիան ողջունել է «Հայաստանի և Ադրբեջանի միջև պատմական խաղաղության ուղղությամբ կատարված նշանակալի քայլը»։ Միաժամանակ, նա խստորեն քննադատել է Թբիլիսիի ներկայիս կառավարությանը, իր խոսքով՝ Վրաստանին ռազմավարական մեկուսացման մղելու համար։
X-ում հրապարակված գրառման մեջ Գախարիան շնորհավորել է Հայաստանի վարչապետ Նիկոլ Փաշինյանին և Ադրբեջանի նախագահ Իլհամ Ալիևին «պատմական խաղաղության ուղղությամբ վերջերս արձանագրված հանգրվանի» կապակցությամբ՝ ընդգծելով, որ այս առաջընթացը հնարավոր է դարձել ԱՄՆ նախագահ Դոնալդ Թրամփի առաջնորդության և ներգրավվածության շնորհիվ։
Գախարիան պնդել է, որ ԱՄՆ-ի կայուն ներգրավվածությունը Հարավային Կովկասում մնում է «կենսական տարածաշրջանային խաղաղության, անվտանգության և բարգավաճման համար», հատկապես այն ժամանակ, երբ երկրներն ակտիվորեն վերադասավորվում են «նոր աշխարհակարգում»։
