Գերմանիայի պատմական պատասխանատվությունը Հոլոքոստի համար մնում է անփոփոխ, և նման ողբերգություն ապագայում երբեք չպետք է կրկնվի։ Այդ մասին Հոլոքոստի զոհերի հիշատակի միջազգային օրը հայտարարել է Գերմանիայի Դաշնային Հանրապետության կանցլեր Ֆրիդրիխ Մերցը։
«Մեր պատմական պատասխանատվությունը մնում է անփոփոխ․ հակասեմիտիզմը Գերմանիայում տեղ չունի։ Մենք հիշում ենք հրեաների համակարգված ոչնչացման մասին՝ ինչպես այսօր՝ Հոլոքոստի զոհերի հիշատակի օրը, այնպես էլ ցանկացած այլ օր։ Երբեք այլևս նման բան չպետք է կրկնվի»,-գրել է Մերցը իր X սոցիալական ցանցի էջում։
Ավելի վաղ Երկրորդ համաշխարհային պատերազմի ամերիկացի վետերան, պահեստազորի գնդապետ Ֆրենկ Կոնը, որը երիտասարդ տարիքում անձամբ վերապրել է Հոլոքոստը, РИА Новости-ին տված հարցազրույցում նշել էր, որ Հոլոքոստի զոհերի հիշատակի միջազգային օրը հիշեցում է այն մասին, թե ինչի կարող է հանգեցնել ատելությունը և որքան բարձր կարող է լինել դրա գինը։
