Հնդկաստանը պատրաստվում է կտրուկ նվազեցնել ԵՄ-ից ներմուծվող ավտոմեքենաների մաքսատուրքերը՝ մինչև 40 տոկոս

Հնդկաստանը նախատեսում է Եվրամիությունից ներմուծվող ավտոմեքենաների մաքսատուրքերը նվազեցնել մինչև 40 տոկոս՝ ներկայիս առավելագույնը 110 տոկոսի փոխարեն։ Այդ մասին հայտնում է Reuters-ը՝ հղում անելով բանակցություններին ծանոթ աղբյուրներին։ Քայլը համարվում է Հնդկաստանի ավտոշուկայի ամենախոշոր բացումը մինչ օրս և կապված է ԵՄ-ի հետ ազատ առևտրի համաձայնագրի շուրջ բանակցությունների ավարտի հետ, որի մասին կողմերը կարող են հայտարարել արդեն մոտ օրերս։

Reuters-ի փոխանցմամբ՝ Հնդկաստանի վարչապետ Նարենդրա Մոդիի կառավարությունը համաձայնել է անմիջապես նվազեցնել մաքսատուրքերը սահմանափակ թվով եվրոպական ավտոմեքենաների համար, որոնց ներմուծման գինը գերազանցում է 15 հազար եվրոն։ Աղբյուրների տվյալներով՝ ժամանակի ընթացքում այդ դրույքաչափը կարող է իջեցվել մինչև 10 տոկոս, ինչը էապես կհեշտացնի եվրոպական արտադրողների՝ մասնավորապես Volkswagen-ի, Mercedes-Benz-ի և BMW-ի մուտքը հնդկական շուկա։ Միևնույն ժամանակ էլեկտրամոբիլները առաջին հինգ տարիներին դուրս կմնան մաքսային արտոնություններից՝ տեղական արտադրողներին պաշտպանելու նպատակով։

Գործակալության տվյալներով՝ Հնդկաստանը կարող է տարեկան շուրջ 200 հազար ներքին այրման շարժիչով ավտոմեքենայի համար կիրառել նվազեցված մաքսատուրք, թեև այդ քվոտան կարող է փոփոխվել վերջին փուլում։ Ներկայում Հնդկաստանը աշխարհի երրորդ խոշոր ավտոշուկան է՝ ԱՄՆ-ից և Չինաստանից հետո, սակայն շուկան հիմնականում վերահսկվում է տեղական և ճապոնական արտադրողների կողմից։ Մաքսատուրքերի նվազեցումը կարող է փոխել շուկայի կառուցվածքը և խթանել եվրոպական նոր ներդրումները երկրում։