Վրաստանի նախկին նախագահ Միխեիլ Սաակաշվիլին, որը կրում է բանտարկության պատիժը, ներկա է գտնվել 2022 թվականի ապրիլից ի վեր իր առաջին դատական նիստին, հաղորդում են տեղական հեռուստաալիքները։
Հինգշաբթի օրը Թբիլիսիի քաղաքային դատարանը լսել է 2007 թվականի նոյեմբերի 7-ին ընդդիմության հանրահավաքը ցրելու գործը։
Դատական նիստում ելույթ ունենալով՝ Սաակաշվիլին քննադատել է կառավարությանը, կոչ արել ընդդիմությանը միասնականության և հայտարարել, որ ազատության մեջ լինելու դեպքում «մեկ ժամից կվերջ դնի «Վրացական երազանք» կուսակցության կառավարմանը։
Սաակաշվիլին լքել է Վրաստանը 2013 թվականին, որից հետո երկրում նրա դեմ հարուցվել է չորս քրեական գործ։ Դրանցից երկուսի դեպքում քաղաքական գործիչը հեռակա դատապարտվել է երեք և վեց տարվա ազատազրկման։
2021 թվականի հոկտեմբերին Սաակաշվիլին գաղտնի ժամանեց Վրաստան, սակայն ձերբակալվեց և հետագայում մեղադրվեց սահմանն անօրինական հատելու մեջ։
2022 թվականի մայիսին, առողջական վիճակի վատթարացման պատճառով, նա տեղափոխվել է Թբիլիսիի մասնավոր «Վիվամեդ» կլինիկա, որտեղ մնացել է մինչև 2025 թվականի նոյեմբերը: Կլինիկայում գտնվելու ընթացքում Սաակաշվիլին պարբերաբար մասնակցել է դատական նիստերին տեսակապի միջոցով:
