Ադրբեջանը Ուկրաինա է ուղարկել էլեկտրատեխնիկական ապրանքների բեռ՝ մեկ միլիոն դոլարի արժեքով, հաղորդում է տեղական «ԱզերՏաջ» գործակալությունը՝ չորեքշաբթի։
«Ադրբեջանի մարդասիրական օգնության շրջանակներում Սումգայիթի տեխնոլոգիական պարկի տարածքից Ուկրաինա ուղարկվել է հերթական էլեկտրատեխնիկական բեռը: Օգնության առաքումն իրականացվել է էներգետիկայի նախարարության կողմից՝ Ադրբեջանի նախագահի Իլհամ Ալիևի 2026 թվականի հունվարի 16-ի հրամանագրի համաձայն:
Մարդասիրական բեռի մեջ ներառվել են 12 ցածր լարման պանել, 11 գեներատոր, 5 տրանսֆորմատոր և 27 հազար մետր մալուխ և լարեր: Օգնության ընդհանուր արժեքը, որը կազմակերպվել է Ուկրաինայի կողմի դիմումի հիման վրա, կազմում է մեկ միլիոն դոլար», – նշվում է հաղորդագրության մեջ:
Ադրբեջանը ավելի վաղ ևս Ուկրաինա մարդասիրական օգնություն էր ուղարկել, որը կապված է էլեկտրական էներգիայի ապահովման հետ: Ադրբեջանից Ուկրաինա տրամադրված մարդասիրական օգնության ընդհանուր արժեքը, ներառյալ վերականգնման և ռեկոնստրուկցիայի նպատակով օգնությունը, արդեն գերազանցել է 45 միլիոն դոլարը:
