Իսրայելի վարչապետ Բենիամին Նեթանյահուն հայտարարել է, որ կընդգրկվի ԱՄՆ նախագահ Դոնալդ Թրամփի նախաձեռնությամբ ստեղծվող Գազայի հատվածում իրավիճակի կարգավորմանը նվիրված «Խաղաղության խորհրդի» կազմում։ Այդ մասին հայտնել է Իսրայելի կառավարության ղեկավարի գրասենյակը։
«Վարչապետ Բենիամին Նեթանյահուն հայտարարել է, որ ընդունում է ԱՄՆ նախագահ Դոնալդ Թրամփի հրավերը և կդառնա «Խաղաղության խորհրդի» անդամ, որի կազմում կընդգրկվեն համաշխարհային առաջնորդներ», — ասվում է հաղորդագրությունում։
Գազայի հարցով «Խաղաղության խորհրդին» միանալու հրավերներ ուղարկվել են բազմաթիվ օտարերկրյա առաջնորդների, այդ թվում՝ Ռուսաստանի նախագահ Վլադիմիր Պուտինին։ Ռուսաստանի նախագահի մամուլի քարտուղար Դմիտրի Պեսկովը հայտնել է, որ այդ առաջարկը ներկայում ուսումնասիրվում է։
Թրամփը մտադիր է գլխավորել այս միջազգային մարմինը, որը, Իսրայելի և պաղեստինյան արմատական ՀԱՄԱՍ շարժման միջև ձեռք բերված պայմանավորվածությունների համաձայն, պետք է իր վրա վերցնի Գազայի հատվածի կառավարումը։ Bloomberg գործակալության տվյալներով՝ ԱՄՆ նախագահը նախատեսում է հաստատել խորհրդի լիազորություններն ու կանոնադրությունը Համաշխարհային տնտեսական ֆորումի շրջանակում՝ Դավոսում, հունվարի 22-ին։
The Wall Street Journal թերթի տեղեկություններով՝ «Խաղաղության խորհրդի» կանոնադրության նախագիծը նախատեսում է, որ այն կարող է զբաղվել ոչ միայն Գազայի հատվածով, այլև այլ տարածքներով, որոնք «տուժել են հակամարտություններից»։
