Եթե Միացյալ Նահանգները փորձեն միացնել Գրենլանդիան, ապա հետագայում կարող են որոշել խախտել նաև հարևան Կանադայի ինքնիշխանությունը։ Նման կարծիք է հայտնել անանուն կանադացի պատգամավորներից մեկը՝ The Wall Street Journal (WSJ) թերթի հետ զրույցում։
«Գոյություն ունի ոչ զրոյական հավանականություն, որ Կանադայի ինքնիշխանությունը կարող է խախտվել։ Եվ եթե խախտվի Գրենլանդիայի ինքնիշխանությունը, մենք կարող ենք դառնալ հաջորդը», — ասել է նա պարբերականին։
Ավելի վաղ կանադական The Globe and Mail թերթը հայտնել էր, որ Կանադայի զինված ուժերը մշակել են գործողությունների ծրագիր ԱՄՆ-ի հնարավոր ներխուժման դեպքում։ Միևնույն ժամանակ Կանադայի պաշտոնական աղբյուրները նշել են, որ ԱՄՆ-ի կողմից իրենց տարածք ներխուժումը համարում են քիչ հավանական։
Ինչպես հաղորդել է Bloomberg գործակալությունը՝ հղում կատարելով Դավոսում անցկացվող Համաշխարհային տնտեսական ֆորումին մասնակցող մի պաշտոնյայի, կա վտանգ, որ Եվրոպան կարող է համաձայնել Գրենլանդիան փոխանցել ԱՄՆ-ին՝ Վաշինգտոնին հաճոյանալու փորձով։
ԱՄՆ նախագահ Դոնալդ Թրամփը բազմիցս հայտարարել է Գրենլանդիան ԱՄՆ-ին միացնելու անհրաժեշտության մասին։ Դեռ իր առաջին նախագահական ժամկետի ընթացքում նա առաջարկել էր գնել կղզին, իսկ 2025 թվականի մարտին վստահություն էր հայտնել, որ այն հնարավոր է անեքսիայի ենթարկել։ Գրենլանդիան հանդիսանում է Դանիայի կազմի մեջ մտնող ինքնավար տարածք։ 1951 թվականին Վաշինգտոնը և Կոպենհագենը, ՆԱՏՕ-ի շրջանակում դաշնակցային պարտավորություններին հավելյալ, ստորագրել են
Գրենլանդիայի պաշտպանության մասին պայմանագիր, որի համաձայն ԱՄՆ-ը պարտավորվել է պաշտպանել կղզին հնարավոր ագրեսիայից։
