ԱՄՆ նախագահ Դոնալդ Թրամփը որդեգրել է Իրանի նկատմամբ լարվածության թուլացման քաղաքականություն և հրաժարվել է հանրապետությունը հարվածելու ծրագրերից՝ Իսրայելի վարչապետ Բենիամին Նեթանյահուի և Սաուդյան Արաբիայի թագաժառանգ և վարչապետ Մուհամմեդ բին Սալման ալ Սաուդի հետ բանակցություններից հետո։ Այս մասին հաղորդում է Axios պորտալը՝ հղում անելով Սպիտակ տան աղբյուրներին։
Պորտալի տվյալներով՝ հունվարի 9-ին ԱՄՆ փոխնախագահ Ջ.Դ. Վենսը հանդիպում է անցկացրել ամերիկացի զինվորականների հետ՝ Իրանում ստեղծված իրավիճակում ռազմական միջամտության հնարավորությունը քննարկելու համար։
Հունվարի 13-ին Թրամփը նախագահեց ևս մեկ խորհրդակցություն և հրամայեց մշակել հանրապետության տարածքում հարված հասցնելու կոնկրետ ծրագիր։ Պորտալի աղբյուրների փոխանցմամբ՝ ծրագիրը ներառում էր հրթիռային հարվածներ ԱՄՆ ռազմածովային ուժերի նավերից և սուզանավերից։
Սակայն Թրամփը ուժի կիրառման վերջնական հրաման չտվեց։ Մինչդեռ, ԱՄՆ զինվորականները հունվարի 14-ի ողջ ընթացքում սպասում էին հրամանին՝ հավատալով, որ որոշումն արդեն կայացված է։
