Եվրոպական հարավային աստղադիտարանի (ESO) աստղագետները հրապարակել են գազի և փոշու հսկայական ամպի պատկեր, որը ձև ունի չղջիկի՝ բացված թևերով, և թռչում է տիեզերքում։ Այս եզակի պատկերը ստացվել է Ատակամա անապատի Պարանալ աստղադիտարանի Շատ մեծ աստղադիտակի (VLT) միջոցով։
Անսովոր միգամածությունը գտնվում է Երկրից մոտավորապես 10,000 լուսային տարի հեռավորության վրա՝ Circinus և Norma հարավային համաստեղությունների միջև։ Այն ընդգրկում է երկնքի մի տարածք, որը հավասար է չորս լիալուսնի և, կարծես, «որսում» է վերևում գտնվող աստղի պայծառ լույսը։
Այս շրջանը աստղային գործարան է, որտեղ ծնվում են նոր աստղեր։ Երիտասարդ աստղերը էներգիա են արձակում, ինչը շրջապատող ջրածնի ատոմներին ստիպում է վառ կարմիր փայլել։ Տիեզերական չղջիկի «կմախքը» կազմող մուգ թելիկները կազմված են փոշու և գազի ավելի խիտ, ավելի սառը ամպերից, որոնք խոչընդոտում են իրենց ետևում տեսանելի լույսը։
Այս միգամածության ամենապայծառ մասերը հայտնի են որպես RCW 94 (չղջիկի աջ «թաթը») և RCW 95 (նրա «մարմինը»)։ Մնացած մասերը դեռևս պաշտոնական անվանումներ չունեն։
Լուսանկարը նկարահանվել է Իտալիայի աստղաֆիզիկայի ազգային ինստիտուտին պատկանող VST աստղադիտակի լայն տեսադաշտով։ Այն հագեցած է ժամանակակից 268 մեգապիքսելանոց OmegaCAM տեսախցիկով, որը ստեղծում է երկնքի հսկայական հատվածների մանրամասն պատկերներ։
Թարգմանությունը՝ Euromedia24.com-ի
