2025 թվականի հոկտեմբերին Հնդկաստանը ԱՄՆ-ից գնել է հում նավթի ռեկորդային քանակություն։ Այդ մասին, հղում անելով Kpler վերլուծական ընկերության տվյալներին, հայտնում է The Economic Times-ը։
Ամերիկյան նավթի օրական մատակարարումները հասել են 540 հազար բարելի, ինչը առավելագույն ցուցանիշն է 2022 թվականից ի վեր։ Վերլուծաբանների կանխատեսմամբ՝ ամիսը կփակվի մոտ 575 հազար բարել օրական, իսկ նոյեմբերին սպասվում է 400–450 հազար բարել ցուցանիշ։
Հնդկաստան մատակարարվող հում նավթի ամենամեծ ծավալը շարունակում է ապահովել Ռուսաստանը, որը կազմում է երկրի ամբողջ ներմուծման մոտ մեկ երրորդը։ Երկրորդ և երրորդ տեղերում են համապատասխանաբար Իրաքը և Սաուդյան Արաբիան։
Kpler-ի վերլուծաբան Սումիտ Ռիտոլիայի խոսքով՝ ամերիկյան նավթի ներմուծման աճը բացատրվում է Brent և WTI տեսակի նավթերի գների տարբերությամբ, ինչպես նաև Չինաստանի պահանջարկի նվազումով։ Նրա խոսքով՝ այդ քայլով Նյու Դելի-ն փորձում է դիվերսիֆիկացնել նավթի մատակարարման աղբյուրները՝ նվազեցնելով կախվածությունը Ռուսաստանից և մեղմացնել առևտրային լարվածությունը Թրամփի վարչակազմի հետ։
