Չեմ պատրաստվում եկեղեցուց դուրս գալ, պատրաստվում եմ շարունակել իմ քահանայությունը։ Այս մասին այսօր՝ հեկտեմբերի 23-ին, Օհանավան գյուղի Հովհաննավանք եկեղեցու տարածքում լրագրողների հետ զրույցում հայտարարեց կարգալույծ արված քահանա Տեր Արամը։
Նրա խոսքով՝ եթե եկեղեցում օրենքը գործում է, ապա մինչեւ իրեն կարգալույծ անելը, հոգևոր կյանքի մեջ անօրենություն գործածները պետք է կարգալույծ եղած լինեին։
«Եթե ես տեսնեի, որ այն մարդիկ, որոնք այս ընթացքում Աստծո նկատմամբ իրենց ուխտը դրժելուց հետո չեն շարունակում քահանայություն անել, միգուցե ես էլ իմ փարաջան կհանեի և եկեղեցուց դուրս կգայի, բայց մինչև Տեր Արամին կարգալույծ անելը գիտեք՝ ինձնից առաջ ինչքան մարդիկ կան, որ ուխտադրուժ են եղել, Աստծո հետ իրենց ուխտը խախտել են և այսօր եկեղեցում իրենց սպասավորությունն են անում։ Ժողովուրդը նրանց գիտի որպես կարգալույծ չեղած մեկը, նրանց ձեռքից հաղորդություն է առնում։
Իսկ Տեր Արամը, որն ուղղակի ըմբոստացել է, եկեղեցու մեջ տեղ գտած վատ դեպքերի հետ կապված իր խոսքը բարձրաձայնել է և ուղղակի իրենց հետ համաձայն չի եղել, ահա նրանց աչքերում ես այլևս քահանա չեմ ․․․»,- նշեց կարգալույծ քահանան։
Դիտարկմանը, որ 2020 թվականին ինքը ցանկանում էր Հայաստանը Կադիրովի նման ղեկավար ունենա, Ստեփան Ասատրյանն այսպես արձագանքեց․
«Ես հիմա էլ եմ Կադիրովի նման ղեկավար ցանկանում և սխալ չեմ համարում։
Դուք կարծում եք, որ Կադիրովը բռնապե՞տ է, այդ նույն բանը Չեչնիայում կարո՞ղ եք հայտարարել։ Տարիներ առաջ ես որևէ իրի կամ առարկայի մասին հնարավոր էր, որ այլ պատկերացում ունենայի, բայց թույլ տվեք ասեմ, որ ես մեծացել եմ, զարգացում է որոշակի տեղի ունեցել, հետընթաց, թե առաջընթաց, դրա մասին ես չէ, որ պետք է վկայեմ․․․
Ես հալածված կերպար եմ, ստորացված կերպար եմ իմ եկեղեցական վերադասի կողմից ու որոշել եմ սրա մասին այլևս չլռել ու ամեն ինչ ասել»։
