Երևանի Կոմիտասի անվան պետական Կոնսերվատորիայում շուրջ 3 տարի է ընթանում են շինարարական աշխատանքներ՝ մասնավորապես առաջին մասնաշենքի հիմնանորոգումը։ Բացի դրանից՝ անցյալ տարի՝ 2024 թվականի հոկտեմբերին, տեղացած հորդառատ անձրևների հետևանքով կոնսերվատորիայի երկրորդ և երրորդ մասնաշենքերի կառուցվող տանիքներից անձրևաջրերը լցվեցին չորրորդից մինչև երկրորդ հարկեր։ «Միայն այն ժամանակահատվածն էր, երբ տանիքները նորոգելու համար բացված էին, և այդ ժամանակ էլ հորդառատ անձրևները եղան ու լցվեցին շենք։ Իսկ նոյեմբերից երկու մասնաշենքի տանիքներն էլ փակ էին, չոր ենք դիմավորել»,- նշեց Կոնսերվատորիայի ռեկտորի պաշտոնակատար Ծովինար Մովսիսյանը։
Վերջինիս խոսքով՝ այս պահի դրությամբ ավարտված են Կոնսերվատորիայի առաջին մասնաշենքի հիմնանորոգման աշխատանքները։ Թեև մասնաշենքը դեռևս չի հանձնվել պաշտոնական շահագործման, սակայն սեպտեմբերի 1-ից ուսանողները դասերն անցկացնում են արդեն նորոգված մասնաշենքում։
«Առաջին մասնաշենքում հիմա նորմալ պարապմունքները ընթանում են, և մեր հիմնական մասնագիտական առարկաները տեղափոխել ենք առաջին մասնաշենք, որպեսզի ուսանողների և պրոֆեսորադասախոսական կազմի աշխատանքային ուսումնական պայմանները լինեն հնարավորինս բարվոք»,- պատասխանեց Մովսիսյանը։
Այն հարցին, թե ի՞նչ վնասներ է կրել Կոնսերվատորիան անցյալ տարվա անձրևներից հետո, նա պատասխանում է,- «ո՛չ, շատ մեծ վնասներ չենք ունեցել։ Իհա՛րկե, ջերմաստիճանի փոփոխությունը կամ բարձր ջերմաստիճանի առկայությունը բացասաբար են ազդում երաժշտական գործիքների վրա, և հենց այդ պատճառով էլ, օրինակ, նոր մասնաշենքը հիմա արված է հաշվի առնելով ջերմամեկուսացնող, օդափոխող, տաքացնող և սառեցնող հարմարանքներով»։
Շինարարական աշխատանքների հետաձգման պատճառների հետ կապված Մովսիսյանը նշեց մի քանիսը, մասնավորապես՝ քիչ աշխատույժ, երբեմն ոչ ինտենսիվ աշխատելաոճ, աշխատանքների ընթացքին չհետևելու դեպքեր և այլն։
Իսկ այն հարցին թե արդյոք այս տարի անձրևաջրերի կուտակումների ռիսկեր կան, Մովսիսյանը պատասխանեց, որ բոլորովին չկան։
Անի Մարգարյան
