Պաշտոնական Երևանն ամեն պահի գնահատում է իրավիճակն ու ընտրում այն ճանապարհը, որն առավել արդյունավետ կլինի։ Այսօր Ազգային ժողովում կառավարության հետ հարցուպատասխանի ժամանակ այս մասին ասաց ՀՀ վարչապետ Նիկոլ Փաշինյանը՝ պատասխանելով «Հայաստան» խմբակցության պատգամավոր Լիլիթ Գալստյանի հարցին, թե արդյոք COP 29-ին ընդառաջ Երևանը պատրաստվում է հրապարակային պահանջել Բաքվից հայ գերիների վերադարձը։
Վարչապետ Փաշինյանը նախ նշեց, որ, կարծում է` COP 29-ը լավ առիթ է` ուշադրությունը կենտրոնացնելու մեր տարածաշրջանում առկա և՛ հրատապ բոլոր խնդիրների, և՛ խաղաղության գործընթացի, և՛ տարածաշրջանի կայունության և զարգացման հարցերի ուղղությամբ։
«Նախորդ տարվա դեկտեմբերին 32 գերեվարված անձինք վերադարձան Հայաստան ոչ թե որ մենք պաշտոնական և հրապարակային հայտարարություններ էինք անում, այլ որ աշխատանքային մակարդակում փնտրում և գտնում էինք հնարավորություններ նրանց վերադարձնելու համար։ Ամեն պահի մենք գնահատում ենք, թե գործողությունների որ տրամաբանությունն ավելի արդյունավետ կլինի այդ իրավիճակում»,- ասաց վարչապետը։
Նրա խոսքով՝ գերեվարված անձանց խնդիրը պաշտոնական Երևանը բարձրացնում է աշխատանքային բոլոր հանդիպումներում և քննարկումներում։ Սակայն հրապարակային և պաշտոնական հայտարարությունների հարցում պետք է առավել զգույշ լինել։ Ըստ վարչապետի` հնարավոր է` պաշտոնական հայտարարությունից հետո հեշտանա վերադարձի գործը, հնարավոր է՝ դժվարանա գործընթացը կամ էլ առհասարակ փակվեն նրանց վերադարձի բոլոր հեռանկարները։
Փաշինյանը հավելեց՝ այն պահին, երբ կառավարությունը կգնահատի, որ հայկական կողմից պաշտոնական հայտարարությունն է պակասում, դա կարվի։
