Ռուսաստանը և Իրանը համապարփակ ռազմավարական գործընկերության մասին համաձայնագիր կստորագրեն

Ռուսաստանի նախագահ Վլադիմիր Պուտինը Կազանում` BRICS-ի գագաթնաժողովի շրջանակներում, հանդիպում է անցկացնում Իրանի նախագահ Մասուդ Փեզեշքիանի հետ:

«Վերջերս մենք Աշխաբադում անցկացրինք շատ բովանդակալից և, կարծում եմ, օգտակար զրույց, քննարկեցինք երկկողմանի համագործակցության հիմնական ասպեկտները և տարածաշրջանային ամենահրատապ թեմաները։ Գլխավորն այն էր, որ հաստատվեց մեր կապերի համակողմանի ամրապնդման փոխադարձ կուրսը։ Դրանք վերելք են ապրում և իսկապես բարեկամական ու կառուցողական բնույթ ունեն»,- ասել է Պուտինն իր իրանցի գործընկերոջ հետ հանդիպմանը:

Շուտով ձեռք բերված արդյունքները կամրագրվեն Ռուսաստանի և Իրանի միջև Համապարփակ ռազմավարական գործընկերության մասին նոր խոշոր միջպետական ​​պայմանագրով, նշել է ՌԴ նախագահը։

«Երախտապարտ ենք, որ ընդունեցիք մեր երկիր  այցելելու հրավերը՝ հանդիսավոր մթնոլորտում այդ և այլ կարևոր փաստաթղթերը ստորագրելու համար», - ասել է Պուտինը։

Իր հերթին Իրանի նախագահը հայտարարել է, որ Ռուսաստանի հետ համապարփակ պայմանագրի ստորագրման ժամկետը կորոշվի մոտ ապագայում։

«Մեր հարաբերությունները տարբեր ոլորտներում՝ տնտեսական, քաղաքական, մշակութային, շատ լավ են շարունակվում, և ես վստահ եմ, որ մենք շուտով կարող ենք ստորագրել այդ համաձայնագիրը»,- ասել է Փեզեշքիանը։

Նա նշել է, որ անձամբ կցանկանար, որ առաջին իսկ հնարավորության դեպքում այդ հարցը վերջնական տեսքի բերվեր ու համաձայնեցվեր։ «Կարծում եմ, որ շուտով կորոշվի այդ պայմանագրի ստորագրման ամսաթիվը»,- ասել է Իրանի նախագահը։