Ռուսաստանի նախագահը շնորհավորել է «Ռուսաստանի հայերի միության» (ՌՀՄ) 25-ամյակին նվիրված հանդիսավոր միջոցառումների մասնակիցներին ու հյուրերին և նշել, որ ՌՀՄ-ն հետևողական աշխատանք է տանում ազգամիջյան հարաբերությունների ներդաշնակեցման և հայկական սփյուռքին ռուսաստանյան հասարակությանն ինտեգրելու ուղղությամբ։ Համապատասխան ուղերձը հրապարակվել է Կրեմլի կայքում։
«Սիրելի՛ բարեկամներ, շնորհավորում եմ ձեզ այս նշանակալի ամսաթվի՝ «Ռուսաստանի հայերի միություն» համառուսաստանյան հասարակական կազմակերպության 25-ամյակի կապակցությամբ։ Ուրախալի է, որ դուք հետևողական աշխատանք եք տանում ազգամիջյան հարաբերությունների ներդաշնակեցման և հայկական սփյուռքին ռուսաստանյան հասարակությանն ինտեգրելու ուղղությամբ։ Մեծապես ձեր կազմակերպության ջանքերի շնորհիվ իրականացվում են նշանակալի մշակութային, կրթական և լուսավորչական նախագծեր, կյանքի են կոչվում երիտասարդական քաղաքականության և երիտասարդ սերնդի հայրենասիրական դաստիարակության ոլորտում կարևոր նախաձեռնություններ», - ասվում է շնորհավորանքում։
ՌԴ նախագահը ընդգծել է այն նշանակալի աջակցությունը, որը Ռուսաստանի հայերի միությունը ցուցաբերում է հատուկ ռազմական գործողության մասնակիցներին և վետերաններին, ինչպես նաև նրանց ընտանիքներին և սիրելիներին։
Պետության ղեկավարը նշել է, որ անցած տարիների ընթացքում ՌՀՄ-ը համախմբել է ողջ երկրի հայկական համայնքները՝ համաժողովրդական գործունեությամբ և պետական մարմինների հետ արդյունավետ երկխոսությամբ և էապես ամրապնդել իր հեղինակությունը։
«Ես վստահ եմ, որ ներկայիս հանդիսավոր միջոցառումները կանցկացվեն պատշաճ մակարդակով և կհանգեցնեն նոր խոստումնալից գաղափարների և ծրագրերի մեկնարկին», - հավելել է Պուտինը։
