Սիդնեյի համալսարանի գիտնականները պարզել են, որ օրական յուրաքանչյուր լրացուցիչ հազար քայլը նվազեցնում է սրտի անբավարարության, սրտի կաթվածի և ինսուլտի ռիսկը բարձր արյան ճնշում ունեցող մարդկանց մոտ: Արդյունքները հրապարակվել են «European Journal of Preventive Cardiology» (EJPC) ամսագրում:
Ուսումնասիրությանը մասնակցել է հիպերտոնիայով տառապող 32,192 մասնակից: Մասնակիցների միջին տարիքը 64 տարեկան էր: Յոթ օրվա ընթացքում նրանք իրենց դաստակներին կրել են աքսելերոմետրեր, որոնք գրանցել են կատարած քայլերի քանակը և քայլքի տեմպը: Դրանից հետո կամավորները հսկվել են գրեթե ութ տարի: Այս ընթացքում գրանցվել է սրտի անբավարարության, սրտի կաթվածի և ինսուլտի 1,935 դեպք:
Վերլուծությունը ցույց է տվել, որ օրական յուրաքանչյուր լրացուցիչ հազար քայլը, որը գերազանցում է 2,300-ը, 17%-ով նվազեցրել է այդ հիվանդությունների զարգացման ընդհանուր ռիսկը: Մասնավորապես, սրտի անբավարարության ռիսկը նվազել է 22%-ով, սրտի կաթվածի ռիսկը՝ 9%-ով, իսկ ինսուլտի՝ 24%-ով: Նմանատիպ արդյունքներ են ստացվել նաև հիպերտոնիա չունեցող 37,350 մարդկանց մասնակցությամբ լրացուցիչ ուսումնասիրության ժամանակ:
Գիտնականները նաև նշել են, որ ավելի արագ քայլելու տեմպը լրացուցիչ նվազեցնում է սրտանոթային պաթոլոգիաների զարգացման հավանականությունը: Հետազոտության հեղինակների խոսքով՝ նշանակալի օգուտներ են նկատվում նույնիսկ այն դեպքում, եթե մարդը չի հասնում օրական սովորական 10 հազար քայլին, բայց արագ է շարժվում:
Թարգմանությունը՝ Euromedia24.com-ի
