Վաշինգտոնի համալսարանի գիտնականների կարծիքով՝ ուղեղը կարող է դառնալ 1-ին տիպի շաքարախտի թերապիայի նոր թիրախ։ Նրանք պարզել են, որ լեպտին հորմոնը կարող է կայունացնել արյան մեջ շաքարի մակարդակը նույնիսկ սուր ինսուլինի անբավարարության դեպքում։ Ուսումնասիրության արդյունքները հրապարակվել են «Կլինիկական հետազոտությունների հանդես» (JCI) ամսագրում։
Հայտնի է, որ շաքարախտի դեպքում ինսուլին հորմոնը անկարող է կատարել իր գործառույթները, ինչի արդյունքում առաջանում է հիպերգլիկեմիա՝ արյան մեջ գլյուկոզի մակարդակի կայուն բարձրացում։ Ծանր դեպքերում սա կարող է հանգեցնել դիաբետիկ կետոացիդոզի (ԴԿԱ) զարգացմանը։ Սա սուր և պոտենցիալ կյանքին սպառնացող բարդություն է, որի դեպքում օրգանիզմում կուտակվում են կետոնային մարմիններ, և զարգանում է նյութափոխանակային ացիդոզ։
ԴԿԱ-ի դեպքում մարմինը սկսում է էներգիա արտադրել ոչ թե գլյուկոզից, այլ ճարպերից։ Միևնույն ժամանակ, կարող է խանգարվել երիկամների գործառույթը, կարող է զարգանալ հոգնածություն, գլխացավ, շփոթվածություն, շնչառության դժվարություն և սրտխառնոց։
Մինչ այժմ համարվում էր, որ ԴԿԱ-ն դադարեցնելու միակ միջոցը ինսուլինի ներարկումն է։ Սակայն մկների վրա կատարված փորձերը ցույց են տվել, որ ուղեղին լեպտինի անմիջական ներարկման դեպքում գլյուկոզի և կետոնային մարմինների կոնցենտրացիան նորմալանում է և մնում է կայուն առանց ինսուլինային թերապիայի։
Հետազոտողները բացատրում են. երբ ինսուլինի պակաս կա, ուղեղը իրավիճակը ընկալում է որպես էներգետիկ ճգնաժամ՝ ակտիվացնելով գլյուկոզի արտակարգ մոբիլիզացման մեխանիզմները: Լեպտինի բացակայությունը, որը ազդարարում է ճարպային պաշարների մասին, ուժեղացնում է այս արձագանքը: Լեպտինի անմիջական կիրառմամբ գիտնականներին հաջողվել է «խաբել» ուղեղը և կանխել շաքարի մակարդակի կտրուկ աճը։
Թիմն արդեն պատրաստում է դիմում FDA-ին (ԱՄՆ-ի Սննդի և դեղերի վարչություն)՝ կլինիկական փորձարկումներ անցկացնելու համար: Հաջողության դեպքում նոր ռազմավարությունը կարող է դառնալ առաջընթաց 1-ին տիպի շաքարախտի բուժման մեջ՝ առանց ամենօրյա ներարկումների և շաքարի մշտական մոնիտորինգի:
Թարգմանությունը՝ Euromedia24.com-ի
