ԱՄՆ կառավարությունը պատժամիջոցներ է կիրառել 50 իրանցի անհատների և կազմակերպությունների, ինչպես նաև Իրանի կողմից վերահսկվող ավելի քան 50 նավերի նկատմամբ, որոնք, Վաշինգտոնի կարծիքով, ներգրավված են եղել նավթի առևտրում:
ԱՄՆ ֆինանսների նախարարությունը հայտարարել է, որ սա 2018 թվականից ի վեր նման ամենամեծ պատժամիջոցների փաթեթն է: «Այսօր կիրառված ավելի քան 115 պատժամիջոցները ամենամեծն են մինչ օրս՝ Թրամփի վարչակազմի կողմից Իրանի դեմ առավելագույն ճնշման արշավը սկսելուց ի վեր։ Այս գործողությունները Ամերիկային դնում են առաջին տեղում՝ թիրախավորելով ռեժիմի էլիտաներին, որոնք շահույթ են ստանում, մինչդեռ Թեհրանը սպառնում է Միացյալ Նահանգների անվտանգությանը», – հայտարարության մեջ ասել է ֆինանսների նախարար Սքոթ Բեսենթը։
Հայտարարության մեջ ասվում է, որ պատժամիջոցների տակ գտնվող անձինք, ընկերությունները և նավերը իրանական նավթի առևտրով զբաղվող համաշխարհային ցանցի մաս էին կազմում։
