Նյու Յորքում Մերձավոր Արևելքի կարգավորմանը նվիրված համաժողովից հետո Արևմտյան 15 երկրների արտգործնախարարները կոչ են արել ճանաչել Պաղեստին պետությունը, հայտնում է Ֆրանսիայի արտաքին գործերի նախարարությունը։
«Մենք՝ Անդորրայի, Ավստրալիայի, Կանադայի, Ֆինլանդիայի, Ֆրանսիայի, Իսլանդիայի, Իռլանդիայի, Լյուքսեմբուրգի, Մալթայի, Նոր Զելանդիայի, Նորվեգիայի, Պորտուգալիայի, Սան Մարինոյի, Սլովենիայի և Իսպանիայի արտաքին գործերի նախարարներս, արդեն ճանաչել կամ արտահայտել ենք մեր երկրների պատրաստակամությունը կամ դրական վերաբերմունքը՝ ճանաչելու Պաղեստին պետությունը որպես երկու պետությունների լուծման ուղղությամբ կարևոր քայլ, և կոչ ենք անում բոլոր այն երկրներին, որոնք դեռ չեն արել դա, միանալ այս կոչին», - ասվում է հայտարարության մեջ։
Նախարարները շեշտել են «Գազայի հատվածը Արևմտյան ափին Պաղեստինի ինքնավարության ներքո միավորելու կարևորությունը» և կոչ արել «այն երկրներին, որոնք դեռևս դա չեն արել, հաստատել նորմալ հարաբերություններ Իսրայելի հետ և հայտնել իրենց պատրաստակամությունը՝ բանակցություններ սկսելու Իսրայելի պետության տարածաշրջանային ինտեգրման վերաբերյալ»։
